楊千嬅、森美、周柏豪與方力申等昨日於尖沙咀出席電影《五個小孩的校長》優先場。談到吳綺莉涉嫌虐兒及藏毒，千嬅坦言不知情不便回應，但指生育是一輩子的責任，對小朋友要有耐性，又指身教比較重要。談到囝囝Torres，她說:「佢仲未開始頑皮同反叛。（郁手唔係咁好？）冇用，佢哋嘅成長速度同我哋唔同，打手板會以為你同佢玩15、20。」曾協助防止虐待兒童協會錄音的森美表示打手掌已經算是虐兒，又指目前對於虐兒的定義界線很高，父母要小心。

周柏豪（左起）、千嬅與森美出席電影優先場。

曾展章暫不停用

此外，吳綺莉契哥、有線高層曾展章說：「事件曝光後我哋有通電話，提醒佢小心處理，Elaine仲反過嚟安慰我，佢話佢大個女，會照顧自己！（報道指囡囡諗過自殺？）佢好有表演天分，又好正面嘅細路女，每次見到我佢都會講自己準備做乜做乜，聽唔到佢講有咩唔開心或睇唔開，唔信佢會想自殺。（Elaine被指酗酒甚至嚴重到扣喉再飲？）佢平時帶個女嚟我屋企食飯，酒都唔飲嘅，因為要揸車返去。不過，佢閂埋門做咩我就唔知啦！（Elaine涉嫌藏毒會停止錄用？）目前都未落案，佢拍緊嘅《寵物ER》仲要趕出街，第二季同佢傾好會再拍，所以今次公司暫唔會有任何動作。」

而與吳綺莉是電台同事的DJ Kawaii則說：「佢係好大膽嘅女人，佢喺廁所對住塊鏡塞好啲墊，唔似啲女星會閃閃縮縮。」她又說：「以前佢經常帶住女兒返電台，節目一播歌，佢就問個女肚唔肚餓？我哋覺得個女都好黐媽咪。（Elaine以前做直播經常去廁所）可能飲得水多啫！（Elaine同劉美娟不和）大家拍檔喺節目裏面有啲火花啫！」