郭穎兒私家枕頭解Homesick

由模起家的郭穎兒（Celia K.）2011年受施念慈賞識，加入公司成為陳靜（DaDa）師妹，並拍過性感寫真集。在公司待了四年多，Celia K.力爭上游，曾擔正三級片《一路向西》做女主角及接拍《喜愛夜蒲3》，雖然脫開有條路，她仍然很珍惜演出機會，更睇準「商機」，殺入內地搵人仔，拍笑片爆發喜劇細胞！

苦練北京腔

Celia K.去年處女下海北上演戲，為參演內地紅爆網劇《廢柴兄弟2》而苦練普通話，在劇中未有性感演出的她，眼見劇集一出街便大受內地網民熱捧，難掩興奮心情：「之前喺北京拍搞笑網劇《廢柴兄弟2》，飾演香港人背包客，成績都相當之好，好榮幸可以參與呢套劇。今次同一肥一瘦嘅男演員合作，都係《廢柴兄弟》上一季嘅班底，大家齊齊搞爛Gag！成套網劇都係講普通話，我講得尚可，都合格嘅，溝通上冇問題！不過北京腔嘅捲脷好難學，要努力練習。」

「打」女唔怕傷

初嘗拍劇滋味的Celia K.一試愛上，對內地拍劇模式大開眼界，邊食邊拍兼準時收工：「我經驗淺未試過拍劇，之前唔知拍劇節奏咁快！導演都話最緊要輕鬆、開心，唔記台詞都冇問題，好多時候即場爆肚都可以！每日仲會買好多生果同零食，可以一路工作一路有嘢食。導演話拍得開心先會感染到觀眾，加上拍劇每日都係拍七個鐘就收工，拍得開心，應該就係內地喜劇嘅特色。拍劇流程快，自己好鍾意試新嘢，自問記對白都算唔錯，想試拍唔同類型嘅劇集。」勇於挑戰的她毫不錫身，更無懼受傷，希望在演藝路上「打」出個未來：「我想試打女角色，做女警揸槍，打打殺殺嘅動作片或者劇集，因為自己都有做開運動！（唔怕受傷？）唔怕，傷痕先代表成功！」

人在異地難免倍思鄉，Celia K.有秘方治療Homesick：「喺內地工作都有兩年啦，已經習慣中港兩邊走，長時間喺內地工作都會好掛住屋企，始終香港是我家，點都會想快啲返去！依家搭長途車會帶埋私家枕頭同被，而且每個地方嘅食物都唔同，未必會啱食，所以我會自備少少糧食，就算唔喺香港都食到香港嘅食物。」

登台掹甩鞋

正所謂「一分耕耘一分收穫」，在內地提高曝光率令Celia K.得到更多工作機會：「間唔中返大陸登台出騷，人氣高咗又賺到人仔，微博粉絲多咗，點都對自己有幫助！」談到內地文化是否很不同？她自爆瘋狂粉絲的熱情好像一把火：「試過有觀眾搶簽名卡，有人發晒脾氣打交，又會掹我隻鞋，成隻鞋甩咗，好在都搵得番！唔同城市有唔同嘅文化，有啲觀眾好熱情，可能少見藝人，所以表現激動。」

克服高山症

工作狂Celia K.除努力搵真銀外，亦懂得生活情趣，久不久便會與朋友結伴自由行，她表示最難忘去年攀雪山時出現高山症：「一生人好難得可以去見一啲景象，或者去好想去嘅地方！上年我去咗好多地方，去咗尼泊爾、西藏、加拿大。最難忘係去西藏有高山症，上山就不停嘔又暈，要吸氧氣，飲『高山水』，最後成功登上海拔四千幾米嘅雪山，影咗好多相！今年八月想去非洲睇動物大遷徙，約咗七個朋友一齊去，希望成事啦！」

有事業及親情，亦需要愛情人生才能圓滿。目前仍然單身的Celia K.揚言不缺心儀對象：「了解中啦！都單身咗一段好長嘅時間，希望有好消息同大家公布！（咩對象？）專業人士，普通男仔一個，佢鍾意運動，可以一齊去做運動。」

後記：無懼寒風

天氣寒冷，但仍有不少青春少艾身穿短褲出街，可見「有身材唔怕晒」才是王道！而愛靚又愛命的Celia K.，私下包成裹蒸糉現身，一埋位影相隨即脫下羽絨外套，剩下背心短裙大騷事業線，凍到騰騰震！影相後，她即時披回外套，並拿出暖水壺呷一口熱茶，全程毫無怨言，兩個字，「專業」！

Profile

姓名：郭穎兒（Celia K.）

出生日期：1986年12月9日（28歲）

三圍：33C、24、33

身高：1米63

體重：43kg