梁齊昕發律師信還擊

早前有指梁齊昕有意闖娛樂圈，處女作是劉俊輝投資兼執導的新片《男極探射燈》，與李逸朗大演對手戲，惟齊昕臨時缺席上月的記者會，其後傳聞滿天飛！有指齊昕家人嫌棄劉俊輝曾拍三級片，亦不喜歡陳惠敏飾演齊昕父親，故擬出錢買回齊昕合約。

「模棱兩可失預算」

昨日劉俊輝舉行記者會，Banner仍寫着「梁齊昕」三字，他否認借對方宣傳，並發表二千字長的聲明指因此事深受困擾！他表示電影原定本月八日開鏡，卻因齊昕致波折重重，並未能如期開拍：「因為佢嘅問題令情況完全失控，我哋電影公司大失預算，無所適從，曾聯絡梁小姐，得番嚟嘅答案係模棱兩可，佢亦再冇出現過關於電影方面嘅籌備會議。」他聲稱因要Hold實劇組檔期及機器已落訂，令電影公司損失達七位數字。對於外傳齊昕家人有意買回合約，劉俊輝否認其事。問到記者會目的，他竟說：「唔知！都要睇佢點先得，或者佢聽朝畀番錢，我咪算數囉！（即係想賠錢？）大佬，借錢畀人都要還啦！」他又不滿追問而一度拂袖而去，未幾笑住折返繼續說：「我活學活用啫！你問我想點，我都模棱兩可囉！」

「一定開拍 最多易角」

劉導席間多次自稱一言九鼎，但有人說話不算數，當記者提醒劉導齊昕已澄清未有受訪，他仍態度強硬：「有人寫我就信喇！」他指《男》片開拍勢在必行：「最多易角！可能佢唔做，我仲發揮得淋漓盡致，唔使綁手綁腳。（不如索性換人？）又唔得，個劇本係為佢而寫，你哋唔好再講呢套係三級片，我想拍二級咋！梁齊昕話要爆粗演，我都叫佢唔好，亦冇床戲，最多冚張被，我Pan過去朵花作交代囉，好粵語長片呀！」自稱信佛的劉導稱倘若最終未能與齊昕合作亦不會失望，只能慨嘆彼此無緣！

另一邊廂，公關鄭紹康昨午代表梁齊昕發表聲明：「事件已交由律師處理，今天下午已派了律師信給劉導演，一切會按香港法律辦事，多謝傳媒朋友關心。」

李逸朗證實已簽約

據了解除男主角李逸朗已簽約外，其他演員彭懷安（Eddie）、樓南光及陳惠敏則仍未動筆兼未收片酬。李逸朗經理人表示他已簽約，正等待電影公司開工，而電影公司指一定會開拍。而飾齊昕爸爸的陳惠敏只回應與電影公司未有簽約，拒答其他問題。早前有出席記者會的Eddie則說：「冇辦法，開得成當然開心，開唔成都冇問題，我未簽約亦未收訂金，之前朋友搵我，公司又話冇問題咪出席記者會，做人咪怕蝕底，希望開得成。」樓南光亦未簽約，他表示不清楚電影能否開拍，沒有聯絡片方，據他所知其他演員亦未簽約，問到可知齊昕有否簽約？他說：「片方話簽咗，實際有冇唔知喇！」