出埠度歲後的「宇宙最強」甄子丹，昨日偕太太汪詩詩舉行公司新春團拜，被譽為好老闆的他為答謝員工，大手筆準備了178份禮物大抽獎！而其姨仔汪圓圓亦偕老公蔡加讚恩愛出席！

甄子丹全晚攬實太太汪詩詩，「愛妻號」果然名不虛傳！

湛琪清（左起）、汪圓圓、汪詩詩、甄子丹、Anthony及Jocelyn齊以紅衫出席子丹公司春茗。

汪圓圓自爆同老公蔡加讚一齊整陶瓷為他慶生，咁特別，難怪老公甜到入心。

甄子丹和太太汪詩詩繼早前離港歡度新歲後，昨日在尖沙咀筵開八席舉行「大家庭」新春團拜，出席的包括旗下藝人名模夫婦Jocelyn和老公Anthony、汪詩詩表妹湛琪清、子丹姨仔汪圓圓及其夫婿蔡加讚，為響應活動，齊穿紅衫上陣，子丹在台上興奮地說：「今日準備咗178份禮物，人人有份，希望同大家一齊發（財）。」他又表示禮物是答謝員工多年來對他及公司的支持，而禮物中更有iPad和iPhone，果然大手筆！

拒子女拍真人騷

提到羊年工作大計，子丹表示仍以拍電影為主，亦有可能嘗試近年Hit爆的真人騷，但謝絕子女出鏡：「今年最少拍三部戲，同埋會拍內地一個電視節目，有少少武功，類似真人騷。（同太太一齊拍？）要睇太太時間。（你哋最有默契？）同佢拍嘢好大壓力，佢對我嘅要求好高！（仔女一齊上鏡？）唔會喇！之前好多節目都想搵對仔女出鏡，畀我推咗，小朋友唔想咁高調，平時影到相OK，但唔會刻意拖佢哋出嚟。」

早前以肥版子丹造型拍攝床褥廣告的他，笑言甚喜歡廣告中的自己：「肥得幾有福氣，老婆都話現實嘅我如果有肚腩都OK，不過我都係鍾意輕身啲。」

圓圓加讚玩驚喜

此外，結婚年多的汪圓圓與蔡加讚婚後愈見恩愛，圓圓自爆月初秘密為老公安排了一個生日活動，令他大感驚喜之餘，更甜入心扉：「佢中學時有學開陶瓷，所以我喺佢生日嗰日Book咗個整陶瓷嘅地方，一齊喺度整陶瓷！（好似人鬼情未了咁浪漫？）個個都咁講，我哋係各自分開做，成手泥，唔係咁浪漫咋！但我覺得如果自己做男人，都幾浪漫！」她又透露女兒Celine首年逗利是已逗得超過一百封，她會為女兒儲起。