許志安即將再踏紅館舞台，昨日在個唱記者會遭兩名性感索女夾攻，身為正人君子的他明顯緊張到「硬晒軚」，連主持亦睇唔過眼，笑他眼神不敢亂放兼手腳僵硬！

許志安及黃柏高被兩名性感女郎「夾攻」，緊張到硬晒軚！

Paco送上金腰帶，預祝安仔的個唱有好成績。

安仔作狀除衫，不過，爆肌Look要等紅館騷先有得睇。

許志安將於5月1日至3日假紅館舉行《Come On許志安演唱會2015》，並於昨日為個唱舉行記者會。現場布置似足拳賽擂台，穿西裝的安仔出場時獲兩名性感女郎作伴，「硬晒軚」的他全程不敢亂望、亂郁，隨即被主持取笑，他拍照時只好翹埋雙手及尷尬地笑。主持問到會否在個唱除衫益觀眾？安仔明言會努力操弗，甚至要比拳手更弗！他其後獲唱片公司揸弗人黃柏高（Paco）送金腰帶，兩人又戴上拳套進行打沙包儀式，寓意安仔在個唱大顯身手！

紅館騷隨時剝

受訪時，安仔透露最近為個唱落力健身，不排除會脫衣騷肌：「真係練到Fit嘅話唔介意益街坊，反而擔心操得勁得滯，瘦到塊面都冇肉！其實依家都傾緊一個代言，都係需要比較弗！」問到是否代言內褲或泳褲？他即笑着否認，又表示為保持最佳狀態已推掉所有活動。

向粉紅Say No

問到衣着的底線，他笑說：「同設計師講咗唔要粉紅色褲或者平腳褲！（三角褲呢？）四角菱形得唔得？Lady GaGa咁？唔得！都係交畀設計師。（赤裸上身？）要睇吓因咩事除，不過可以慳到演唱會服裝成本！」他又透露現正積極邀請嘉賓：「我都有好多合唱歌，希望可以同啲嘉賓帶到新嘅火花畀大家！」