內地片商重金禮聘吳君如於新片中再扮男人，但她竟然「嫌錢腥」婉拒邀請！貴為影后的她坦言扮男人需要時間沉澱及重新整理，故計劃再進修學戲。

於《12金鴨》扮男人的君如，面對內地片商以八百萬片酬力邀反串，仍不為所動！

蔡瀚億（左起）、君如及劉浩龍謝票期間到旺角小食店醫肚。

君如主演的《12金鴨》贏盡口碑，其角色「Future哥」的形象深入民心。據知有片商睇中君如穿男裝「型英帥靚正」，出動銀彈攻勢，以雙倍酬金利誘目前片酬約400萬港元的君如「再下一城」，她說：「係有人搵過我，但今次反串，單係黐假上身都搞到我好攰，所以應該唔會考慮啦！不過如果女主角係大美人，又另作別論！」

慶功宴擺十幾圍

貴為笑片王后的君如縱橫影壇多年，歷年來的經典角色深入民心，她於《賭聖》中飾演「阿萍」一角，與笑匠周星馳鬥戲，更放下矜持挖鼻，奠定搞笑形象！她亦曾於《古惑仔》系列中擔正演「十三妹」，由無知少女演到社團大家姐，更勇奪1999年的金像影后！君如的演技毋庸置疑，惟她卻謙稱要再進修「補鐘」：「自從演完男人之後，我依家覺得做戲、未來會仲有更大嘅挑戰，所以依家都要沉澱幾個月，去學演技、學做戲。」

於美國充電返港後，君如連日來積極謝票，前晚她偕「三色鴨」劉浩龍、姜皓文及蔡瀚億等現身戲院。談到票房已超過2,100萬港元，氣勢直逼其他對手，她說：「舊年得四部（賀歲片），今年大混戰，又大片又動畫，年年都係咁講咁鬥，最重要係吸引人入場睇戲，不過今次又真係可以向股東交代，因為唔使蝕錢嘛！」並透露暫定本周六再搞慶功宴：「會擺番十幾圍，比我自己結婚仲要多呀！」

加長版取材「鴨店」

至於以盧海鵬及彭于晏作賣點的加長版，原來取材自台灣「鴨店」的真實個案，君如說：「有個年紀大啲嘅鴨，拎張相出嚟話係佢後生時影嘅，但嗰張相一睇就知係個明星！」謝票期間，由於趕場令各演員未有時間進食，君如索性拉隊到旺角掃街醫肚，吸引不少途人圍觀及要求合照簽名。