成龍最近到北京宣傳新片《天將雄師》，被問及兒子房祖名重獲自由後的近況，他寧願多番鞠躬亦拒作回應。不過，他接受本報訪問時終敞開心扉，暢談祖名各種轉變及父子間的點滴，更坦言現時「仔好，老婆開心」，人生已屆無求之境！

成龍接受本報訪問時分享祖名重獲自由後的一切，認為兒子有不少轉變。

祖名回家後，林鳳嬌變得開朗，不再愁容滿面。

成龍認為祖名有天分，有意讓兒子參與創作《十二生肖》續集劇本。

成龍憶述當日與重獲自由的祖名首度重逢的情景，他說：「聽公司同事講個仔都緊張，我上樓嗰陣佢哋仲用對講機『通水』，一打開門，我同佢深深一攬，冇講嘢，阿嬌（林鳳嬌）就笑住話：『吃飯吧！』我哋餐飯冇乜講嘢，但感覺好溫馨，好耐冇咁樣啦！但耐咗就有啲尷尬，於是我叫佢講吓看守所情況，佢話同幾多人一齊坐、入面好凍，喺入面半年一句怨言都冇，仲話：『老竇，我比你經驗多，以後問我！』當時我見到阿嬌不斷睇住我哋，但只喺旁邊笑，畀我哋兩父子傾。」

笑太太有仔萬事足

他透露事發後太太每天都留在家中，一度擔心她患上抑鬱，所以時刻保持聯絡：「點知個仔返咗嚟，佢有仔萬事足，依家我傳到第8張相畀佢，佢先肯覆我！冇所謂，佢開心就得。嗰晚傾傾吓，不經不覺就天光。」

「佢唔敢抬頭望我」

他又表示看到祖名有不少好轉變：「有規矩咗，以前懶懶閒，集中力唔夠，講兩句就行咗去。依家啲鞋擺到好整齊，仲肯拎碗、摺衫，我同佢講：『不如你每年都返去坐半年！』佢話冇事點入去？我話：『你要求呀，又靜又可以寫歌！』（父子感情親密咗？無所不談？）冇乜，不過以前睇電視都可以有衝突，依家冇。我感覺佢有好多嘢想講，又彈歌我聽，又話想寫劇本。（你一句都冇鬧佢？）冇，既成事實鬧唔番，佢都受咗懲罰。不過佢唔敢抬頭望我，仲覺得愧疚，咁嘅祖名我反而唔慣！」