發哥哲學：再賦予生命

神級影帝周潤發除了演技精湛，亦是一名攝影發燒友，他入行前曾售賣相機，被快門聲吸引自此愛上攝影，不論菲林或數碼，黑白相還是彩色相，發哥都相當精通，曾贏得不少獎項及舉行攝影展，是圈中少有的攝影高手。日前發哥到北京宣傳新片《賭城風雲II》，順道與好友鄭振耀及師傅梁藝到六環區郊拍照，並帶同《東網》記者隨行，機會難得。

攝影比喻人生

在人前談笑風生的發哥攝影時寡言認真，無視只得約零下五度的天氣，輕盈地在崎嶇山路及濕滑冰面上來回搵景，每當發現一幀有潛質的畫面，他都會仔細研究，甚至幾分鐘不言不語沉思，期間他拍下遼闊的風景外，亦會留意往往被忽視的小事物，例如此行便攝下了躺在冰湖面上的一塊落葉，以及冰底下的殘荷，作品同樣具張力層次。

將近六十歲的發哥以深遽眼神看盡世情，訪問時以攝影比喻人生，值得細味，問到是否喜歡在微細事物中發掘優點？他說：「睇吓你鍾唔鍾意個樣嘢囉！鍾意就睇到好多嘢！你唔鍾意嘅，你會話影嚟做乜吖塊爛葉，但其實你依家雖然見到嘅荷葉係殘晒，但喺黑房度二次創作，再賦予佢生命，靚到不得了！我多數影靜態物件，如果影到有種生氣，好玩！亦係種挑戰。」

不斷追求完美

攝影技術早獲認同的發哥仍謙虛地表示暫時未有完美的作品：「永遠都唔會滿足，要不斷追求，同做戲有啲相似，會諗原來咁樣會好啲喎！」話雖如此，發哥深明凡事不可強求，抱着隨遇而安的心態捕捉美景：「好似今日有光，但你第日嚟，冇光又影唔到，影相要天時地利人和配合。（影唔到理想作品會唔會失落？）點會失落呢？第一時間你對眼、你個身體已經享受咗先啦！影唔影到都唔係咁緊要，影到咪當係Bonus囉！影唔到都已經享受咗好舒服嘅環境。（影到張靚相定係攞影帝開心啲？）哈哈！兩樣都開心，影相比較自我，影帝係人哋嘅認同。」發哥又認為攝影及做導演拍戲的思考過程相似，但執導要兼顧的事情更多，因此暫時無意過導演癮。