有線女主播可宜自小在外國長大，卻對中西美食略有研究，笑言雖然不是美女廚神，但也絕不是地獄廚神。她認為通過各種烹調方法，有助紓緩情緒，把壓力釋放之餘，更從中練出一對巧手，為未來成為好太太及母親作準備。

自小有偏食習慣的可宜，自到英國讀書後才領會到煮食的樂趣。

可宜十分享受烹調過程，為她帶來很多樂趣。

烹飪是可宜獨特的減壓方法，有助紓緩情緒。

可宜希望繼承母親衣鉢，煮得一手好菜，做一個內外兼備的好太太及好媽媽。

自小在外國長大的可宜對中西美食略有研究。

從小便做到「入得廚房、出得廳堂」的Natalie大讚有個靚媽媽廚神，卻謙虛地表示在這方面得不到真傳，只是很享受烹調過程中所帶來的樂趣：「由細到大，爹哋媽咪畀我自由度好大，唔會強迫我學呢樣學嗰樣，認為每個人都有長處，係自由發展，而唔係逼出嚟。我自問煮得唔叻，亦冇乜天分，但就唔會食死人，哈哈！其實我都煮得唔差，當然冇得同媽媽比，佢永遠都係我心目中的No.1靚媽廚神！」她表示平日亦愛與三五知己及父母到處試食，平貴都會試不停：「我覺得美食係冇分國家，亦冇分平貴，餐廳同大牌檔都會照食一餐。」

留英愛上烹飪

她還自爆有一段時間愛偏食，後來到英國升學才令她領會到美食帶來的樂趣：「小朋友有偏食習慣好平常，我話我冇偏食過你都唔信啦！不過去到英國讀書，冇媽咪喺身邊，除咗自己煮，大部分時間都會同啲同學仔出街食，冇理由個個都遷就你，就得一次、就唔到第二次，所以就算我唔想食，都會扮冇所謂，到最後自己都會愛上碟餸，之後仲會返屋企鑽研點煮，興致到仲會煮大餐畀同學仔食，佢哋食完都話OK！」

她坦言雖然中餐的烹調方法遠比西餐來得複雜，樂趣卻不同，更漸漸變成個人的減壓好方法，有助紓緩情緒：「烹調過程會將集中力放喺各樣用料同調味料上，更要控制火候，你個腦根本冇位再諗其他嘢，嗰刻只想煮得好食，令大家開心，又讚吓我，真係好有成功感同滿足感。」

可宜又笑言現已練出一對巧手，為將來作好準備：「結婚雖然現階段對我嚟講係長遠事，冇咁迫切，但老公同小朋友係我原動力，相信我日後會繼承到媽咪衣鉢，煮得更出色，做一個內外兼備嘅好太太同好媽媽。」相信Natalie將來一定會為美滿家庭帶來色香味俱全的新「煮」意！