歌手胡鴻鈞（Hubert）近日第二次接拍電視劇，在無綫新劇首次挑戰悲情殭屍角色，不談情只騷肌！為角色努力操肌的他，希望將來有機會扮演學生哥！

唱而優則演的Hubert，希望有機會扮演學生哥。

有一排朱古力的Hubert即將在新劇騷Quali，想引死粉絲咩！

為以完美狀態示人，Hubert努力做Gym操肌。

從歌唱比賽出身的Hubert近年由樂壇轉戰拍劇，挑戰帥氣殭屍的他認為甚有挑戰性：「今次有機會同好多大卡士合作，好似謝安琪同鄭嘉穎等，劇入面我會飾演一隻殭屍，首先身形方面需要瘦削得來有啲鋼條，第二會戴殭屍牙同埋有色隱形眼鏡，其實自己都幾緊張今次演出！」

做Gym露肉

問到會否在劇中發展感情線？他說：「我今次嘅角色其實算係一個悲劇人物，因為我係一隻被爸爸囚禁咗幾百年嘅殭屍，後來帶住仇恨報復，最終被爸爸殺死，所以基本上冇感情線。」他又透露角色沒太多動作場面，與同劇演員相比較輕鬆。至於事前準備工夫方面，Hubert認為「操肌」最重要：「因為角色一開頭衣衫襤褸，會露吓肉，所以我特登為呢個角色勤力啲做番Gym，不過好彩之前拍廣告時身形都算Keep得唔錯。」

擔心撞板

Hubert坦言拍劇比參加比賽更大壓力：「拍劇對我嚟講始終好新，所以會有好多顧慮，我都預咗自己可能會撞吓板，或者為劇組帶來不便，但希望盡量將呢個情況減到最低！」他最希望拍青春校園風的題材做學生：「因為我都係畢業冇幾耐，如果可以做呢類角色，感覺同自己幾貼近！」