張學友接受電台訪問時提及熱爆的內地歌唱節目《我是歌手3》，參加歌唱比賽出身的他自嘲太「渣」，不及參賽歌手有勇氣，身為歌神的他又笑說：「佢哋好勁。」

學友已厭倦互相競爭的生活，只求唱得自在。

最新一期《好報》獨家披露學友安排女兒秘密回流，並入讀貴族學校。

《好報》

歌神張學友日前到電台宣傳國語專輯，問到有否留意內地歌唱節目？他說：「都有睇。（會參加？）唔想再比賽，唔係反對呢啲節目，只係過唔到自己嗰關。我已經畀人攞嚟比較咗一世，真係攰，近呢十年覺得幾自在，寧願自在咁唱歌。」

佩服參賽者有膽量

他又坦言佩服參賽歌手，提到他有「歌神」之稱，不需透過比賽肯定歌藝，他笑說：「唔係咁嘅，我渣啫，佢哋勁啲！佢哋有勇氣好多。」對於不少歌手獻唱時都愛飆高音，學友表示很難界定對錯：「我嘅經驗係比賽過程好玩同開心，唔係輸定贏，如果你係唱得，有朝一日都會贏。」

廿四孝爸爸管接送

另外，最新一期《好報》獨家披露廿四孝爸爸學友前年為了讓大女張瑤華學習獨立，特意送乖女到英國讀書，可惜瑤華不習慣當地生活。學友與老婆羅美薇尊重女兒的意願，經商量後安排瑤華在去年回流，並安排她入讀每年學費至少17萬港元、位於屯門的英國貴族哈羅國際學校，學友日前更親自由淺水灣寓所駕車到屯門接女兒放學，認真唔話得！