80歲資深配音員丁羽是林保全師傅，昨日前往靈堂致祭，剛於日前為太太辦完喪事的他傷感地說：「諗唔到我太太25號喺隔籬搞完，今日到我愛徒。」語畢，老淚縱橫，激動得哭成淚人。其後他說：「啲人叫我咪嚟，會相沖，我身體又欠佳，但保全係我愛徒，芷筠又係我契女，我唔理！我百無禁忌！多得保全當年唔怕辛苦同我一齊工作，我哋試過一日工作22小時，當時我叫佢：『唔使咁辛苦啦！』，保全同我講：『師傅你都咁辛苦，我點會唔捱得？』保全嘅點滴，我會永遠記在心！」

丁羽講起愛徒林保全，哭成淚人。

對於愛徒的工作態度，丁羽叔讚不絕口：「保全係值得配音員學習，佢做嘢要求做到完美，我有配音界鬼門關之稱，過到我嗰關先叫OK！保全試過配得已經非常完美，但都堅持再配、再錄，嗰兩個音又真係好咗，我最鍾意佢做事認真唔求其！」