動作女星陳鈺芸日前憑真功夫獲邀演荷里活電影，她自爆拍戲時誤被同片演員揮劍打爆右眼角險盲！傷愈後她又預告出戰拳賽，故密密苦練腿功，誓要成為性感女拳王！

JuJu封李小龍做偶像，起飛腳係拿手好戲！

眼傷剛愈的JuJu，已投入備戰世錦賽。

JuJu拳擊一樣掂，難怪可以打入荷里活。

陳鈺芸（JuJu）早前憑拳腳功夫打入荷里活，獲得演出電影《臥虎藏龍2》的機會。JuJu於戲中飾演「宇宙最強」甄子丹身邊的四大武林高手，身為唯一女將的她更會於高空「跳樓」晒飛鏢絕技！而熱愛極限運動的她認為首度「吊威吔」零難度：「我本身好鍾意笨豬跳同激流，所以第一次吊威吔要喺屋頂跳三層樓高都OK！（未驚過？）我唔畏高又鍾意刺激！」她透露提早一個月苦練飛鏢：「我對自己眼界有信心，但都要提早一個月去Train！」又踢爆導演袁和平雖年屆70歲，但於戲外經常親身耍劍「度招」，手腳更是極為靈活。

李三腳最耍家

戲中由頭打到落尾的JuJu表示受傷乃家常便飯，拍攝期間她被演員不慎揮劍打中右眼角，當場爆喊：「右眼腫到睇唔到嘢，痛到以為盲咗，喊到失控，好彩一星期後散到瘀！」她又透露拍畢電影後將出戰於北韓舉行的跆拳道世錦賽，眼傷初愈便投入密集式操練，更以低胸「李小龍」的性感造型狂晒腿功！拒當花瓶的JuJu無論凌空踢腿、揮拳及耍雙節棍都得心應手，更視李小龍為永遠的偶像：「佢嘅『李三腳』係我得意技，我好想延續佢嘅武術精神，同話畀人聽我堅係打得！」