身兼時裝設計師及模特兒的簡幗儀坦言，做Model對她在時裝界發展大有幫助，前年成立個人品牌的她，不時贊助謝安琪、劉心悠及薛凱琪等女星出席活動！

由模特兒到設計師，身兼兩職的Lilian以積蓄創業圓夢。

Lilian首推劉心悠作為其品牌的完美「代言人」。

畢業於理工大學的模特兒兼時裝設計師簡幗儀（Lilian Kan），不時為女星設計晚裝，問到誰穿得最靚？她選出三大女神薛凱琪、謝安琪及劉心悠：「其實有好多我都好鍾意嘅，呢幾個着完出嚟真係好驚艷！」

攞積蓄豪賭一鋪

碩士畢業後不足兩年，她便開設工作室成立個人品牌，Lilian表示創業全因希望自己話事：「畢業之後，喺一間婚紗晚裝公司做咗年幾兩年，之後好多嘢想自己話事，於是就嘗試去Set Up自己嘅牌子！其實係好細個開始嘅夢想，但係冇諗過咁快。唔係特別叻，係大膽少少o架咋！我大學開始做Modeling工作，跟住出嚟做嘢年幾、兩年，都有少少積蓄。」

兼任Model設計師

前年成立個人品牌後，Lilian需要同時兼顧模特兒及品牌的設計工作：「分配時間上又唔係好困難嘅，因為都係自己處理。主要係呢度行先嘅，只不過Modeling嘅工作我唔可以控制個時間。」天生較內向的她認為，當模特兒後變得較活潑：「我本身個人好內向好怕醜，慢慢出去做Model，接觸多咗人，對鏡頭冇咁怕醜！」並指模特兒工作對其設計事業有所幫助，從中學懂談吐及認識到時裝界相關人士。