許廷鏗近年在頒獎禮異軍突起，大熱歌曲一首接一首，毫無疑問地位已直逼一線歌手，他卻沒有因而乘勝追擊，反而願意花上逾一年時間製作充滿新嘗試的大碟。有時刻意放慢腳步，是為了走得更遠。

許廷鏗期望事業有突破，不惜放慢腳步尋求新方向。

Alfred慶幸家人一直在背後支持，令他可勇往直前。

Alfred對感情事顧慮多多，不敢貿然發展戀情。

當年憑「巨聲幫」揚名的許廷鏗（Alfred），憑俊朗外形及厚實唱腔令觀眾留下深刻印象，年前更憑一曲《青春頒》橫掃多個頒獎禮，風頭一時無兩，創立獨門的「許氏情歌」！掌聲過後，他沒有被勝利沖昏頭腦，反而積極反省不足之處：「之前開演唱會睇到Rundown，發現個人曲風唔夠多，所以同公司申請，希望新碟做多少少輕快歌，公司都願意畀我試。其實長遠嚟講係對自己好，大家聽慣慢歌，但我想要突破。」

細味親友關懷

籌備逾一年，新碟終面世，Alfred說：「今次隻碟多咗好多個人參與，可能大家喺電視見我只係嗰幾分鐘，其實我仲有好多嘢想表達。我又專登搵歌唱老師進修，所以成個錄音時間長咗好多。」他努力求變的背後原因，是緣於其踏實個性：「我覺得事業係冇得急，上年初嘅成績其實係撞出嚟，感覺唔夠腳踏實地，所以要好好裝備。我唔急進，鍾意一切慢慢嚟，可能係咁先選擇牙科，要慢慢儲。」

Alfred事業目標明確，同時慶幸家人一直在背後支持：「入行後的確少咗好多時間，但同時多咗好多經歷。屋企人近年多咗見面同話題，平時佢哋會上社交網站睇我做緊咩。」過程中又經過一番學習，了解家人的心意：「以前會覺得佢哋煩，出去做咗成日嘢已經攰，返嚟仲要交代，試過發脾氣，後來先學識喺佢哋角度諗吓，好似今日做嘢前都陪屋企人食完飯先。呢幾年做好多訪問，同時都係同自己交流，改善咗說話技巧。」

落閘自斷紅線

Alfred全力投身工作，坦言感情生活是零：「零咗好耐，其實朋友圈內有適合對象，但我冇將愛情投放得好大。」他又自言刻意關上情感大門：「曾經有可以發展嘅人，但我冇開始，因為覺得段關係會不公平，我可以付出嘅時間同心機同對方唔成比例。」他續說：「我唔鍾意同行內人拍拖，以前識個牙科同學全家都係整牙，所以日日返屋企都係講呢樣嘢，我唔鍾意，亦唔係我想要嘅關係。但要搵一個圈外人，佢又要明白你嘅工作其實有難度，令我唔敢開始。相信有一日需要時，我會去追尋，但呢一刻就未需要。」