黃翠如昨日孖男友蕭正楠（Edwin）出席無綫劇《師奶MADAM》宣傳活動，席間大晒恩愛玩煮飯仔整手撕雞，翠如又Sweet爆餵Edwin食雞髀，其後二人又互餵，而劇中主要演員曹永廉和謝雪心等亦有出席。提到翠如前緋聞男友洪永城日前高調公開追求唐詩詠及大讚對方一事，翠如毫不避忌說：「係囉！佢都冇咁讚過我，除非有人影到，冇相我哋唔會信。」又呼籲記者偷拍洪、唐約會，更揚言在情人節搞個Couples Dating，充當紅娘撮合洪、唐：「如果佢哋唔應我哋邀請就麻煩大家影佢兩個相，呢個就係最好嘅情人節禮物喇！」

黃翠如與蕭正楠互相餵食，更大耍花槍。

另外，Edwin又大爆女友的片場「床事」，笑稱翠如等埋位時瞓覺扯鼻鼾：「試過拍拍吓戲唔見咗佢，後尾就聽到鼻鼾聲，搵個鼻鼾聲先搵番佢出嚟。」弄得翠如怒髮衝冠，一氣之下怒打Edwin手臂，二人即場大耍花槍。