郭富城昨日出席活動時自爆「感情空白期」已踏入第二年，Dry爆的他談及舊愛熊黛林找到幸福時，未知是否被觸動情絲，竟揚言希望上天為他安排合適對象，組織家庭！

城城與奧雲大談健身及賽馬經，十分投契！

舊愛Lynn與郭可頌拍拖，城城大方送祝福。

溫碧霞悉心打扮出席馬場活動。

楊愛瑾與男友郭永淳結伴到場。

郭富城與前英格蘭國腳米高奧雲（Michael Owen）昨日出席馬場紀念盃活動，二人雞啄唔斷。城城表示近來因在無錫拍電影而冷病，身體抱恙致消瘦不少，但明天便起行飛返當地，回歸陣容龐大的拍攝團隊，專心完成工作。

伴侶要內外兼備

談及舊愛熊黛林（Lynn）投入新戀情，會否祝福對方？城城大方地說：「身邊每個人開心都會祝福。（祝福佢？）當然會祝福，我呢兩年感情空白，我嘅時間都係擺晒工作上，緣分天注定，唔會刻意強求。」問到Lynn曾暗示他令人缺乏安全感？他說：「過去嘅事唔再評論，因為我係男人，好多嘢放喺心上，我會去承受，我唔會用口去批評任何人，呢個唔係我風格同態度。呢排見到佢咁幸福，我都好戥佢開心，依家冇嘢可以令我分心工作，不過我都希望將來上天會安排一個好錫、好體諒同明白我嘅另一半畀我，自己都會諗吓一個幸福家庭係點樣。（你要求係咩？）有內涵、內在美同外在美。」

對於早前因桃色傳聞而成焦點，城城再三強調已在微博交代清楚，拒再回應失實報道：「再回應就變連續劇，同埋我已寬恕傷害我嘅人，唔會追究啦！喺娛樂圈最緊要係做好自己。（以後唔會再喺社交網站Add後輩？）唔再回應嗰啲事啦！好多內容同新聞都唔係事實，呢啲嘢侮辱得我好緊要，希望大家尊重番我。」

奧雲與港足切磋

專程訪港及逗留三天的奧雲笑言希望跟城城健身及賽馬，分享共同興趣！他還透露前晚已率先品嘗香港地道美食，今天將與香港足球隊切磋球技，交流足球心得。

問到若城城向他的馬房購買駿馬有何感覺？奧雲高興地說：「好啊！我都期待。（會幫佢訓練駿馬？）我有兩個練馬師，睇吓有冇呢個機會。（畀優惠價佢？）佢唔需要啦！」