記：佢要求幾多生活費？你願意支付幾多？

胡：佢要錢，可以傾，呢幾個月，透過協調員同佢傾，佢全部唔睬，一係要名分，拿唔到名分就要破壞我聲譽，將事實歪曲，我同佢之間有大把證人可以做證，佢每次要求嘅數目都唔同，不斷增加，五位數去到六位數，數目仲多過我正式婚姻嘅贍養費，佢要同我分身家，點有可能？我經濟能力都有限，兩段婚姻都唔平，成立咗個信託基金又少咗啲，咁我都要留畀啲仔女，而且我自己都想退休啦，我都六十幾歲，段路都秋天，做人要適可而止。如果佢係諗住藉攻擊我而拿多啲贍養費，我係絕對唔會，而且肯定仲會有反效果。

記：你覺得佢有冇愛過你？

胡：我只可以講，佢喺英國時好好，我哋都好好，返到嚟香港就變晒，每逢周末就抱個女返娘家，擺低畀佢爸爸，就同江欣燕出咗去，試過好多次我下晝去佢屋企同佢老竇傾偈到夜晚，江希文都未返屋企。佢個心唔喺我度，處心積慮要誣衊、挑釁我，動不動就錄音，玩嘢。

哭求母親原諒

記：你媽咪知唔知你同Liz依家搞到咁？

胡：原來我阿媽畀我嘅勸告係啱，（突然激動）佢當初反對我哋係有理由，佢真係有唔畀我阿媽入屋，情況等同依家我同我嘅仔女都被佢拒諸家門外，佢講到我係暴魔，話有人身安全，我仲點敢返去，我啲仔女頂唔順佢，唔想留喺屋企，佢哋亦得到我前妻同意發咗律師信畀佢，呢幾個月我同仔女都生活得好辛苦，搞到咁，我想藉此同阿媽道歉，（哭泣）希望得到佢原諒，我真係錯喇！

記：件事發展到咁覺唔覺得丟架？老貓燒鬚？

胡：唔覺，呢個係一個教訓，如果咁講即係要論輸贏，冇贏o架，只會雙輸再咁搞落去。

記：咁你下一步點做？

胡：我今次交代完，我會馬上入禀法院要求保護個女，要求佢唔好再帶個女出嚟做騷，佢唔好再擺個女上枱，同埋希望佢爸爸可以做個女嘅監護人，容許個孫女可以喺娘家生活，咁樣我比較放心，但沙宣道仍然預留一間畀女女，係冇牴觸嘅兩件事，我亦會向法庭申請禁制令，要求佢唔好再霸住沙宣道，我唔係要趕佢走，佢同個女都可以喺度住，但喺番適當嘅範圍生活。

據知，昨日胡漢清已跟律師傾談，亦正式入禀法院，一切已進入法律程序。俗語有云：清官難審家務事，二人的恩怨發展如何，仍然是未知之數，只希望大人的事不要影響小朋友而已。