胡漢清揭江希文挑釁想分身家

記：記者　胡：胡漢清

記：同江希文幾時開始、同埋因乜嘢事而決裂？

胡：我要講番由2012年七月透過娛樂公司高層Gary Chan認識江希文，八月撻着，之後有咗關係，九月二號係佢生日，佢話想介紹家人畀我識，當時搞咗個生日會，席間佢同我講有咗，我問佢想點？佢話想Keep，我話支持，但我同佢講，我哋啱啱認識，我都60幾歲，段路都秋天啦，而且又有過兩段婚姻，唔可以再錯，我就話我哋共同做BB父母，我哋繼續拍拖了解，咁不如訂婚先啦，我喺英國長大，根據嗰邊做法，訂婚係要雙方家長同意，我話要問咗阿媽先，當時我阿媽係反對，我同阿媽講，我一定要訂婚，阿媽話你訂啦，我唔會嚟，就嬲咗我去上海，之後就發生官司。訂婚廣告出咗之後，好多人打畀我，問我識咗佢幾耐？知唔知佢嘅過去？原來有啲嘢好多人都知，淨係我唔知，後來Liz向我寫咗兩封信自白，承認一啲事，我當時受到感動，覺得佢有咁嘅勇氣承認，之後我同兩個朋友傾過，其中一個係Gary Chan，佢哋話如果你接受到，仲想同佢繼續行落去，咁Liz暫時離開香港比較適合，我選擇咗「攬」佢，BB都有埋，我又咁鍾意小朋友，我都六十幾歲啦，都唔想孤伶伶一個人，至於去英國係佢嘅意思，佢話嗰邊有親戚，我嘅仔女又想喺嗰邊讀書，所以我都好贊成，大家協議佢過去生BB同生活，至少到小朋友入幼稚園，時間大概三年，佢亦都同意。最後佢喺2012年10月過去，2013年四月生BB，期間我幫佢搞居英權，使咗唔少錢，又買屋買車，佢生嘅時候，我忙緊阿媽嘅事，同埋自己有幫人打緊官司，行唔開，但我哋一直有視頻，而幾乎每隔一個月就過去，嗰段時間大家係最開心，我每個月自動轉帳唔少於5,000英鎊（約58,000港元）生活費畀佢，屋企所有開支佢唔需要支付。直至2014年四月，佢話想帶個女返香港同爸爸媽咪同個女慶祝生日，講咗八月返番英國，我回程機票都買埋，到八月尾，佢就話想過埋九月二日自己生日先，我都話OK，過咗生日，佢就話唔返英國，除非即刻去登記，大家都開始成日嘈交，佢好似變咗第二個人咁，食番煙飲番酒，成日挑釁我，然後就發生嗰次碰撞事件。

鬧交互爆粗

記：佢話你打佢？

胡：Liz性格好硬，我性格亦一樣，9月13日我同個女喺屋企，我見到個打火機，我就收埋佢，Liz返到嚟，問我要火機，我畀佢，佢就屈我做乜拎個火機畀個女玩，大家嘈交，佢對我講咗句粗口，我亦有講粗口，期間佢叫我畀番個女佢（當時我抱住佢），我話唔畀，佢就擸起把餐刀一下用刀尾鋤我大髀，我就推開佢，我有職業病，唔會做任何襲擊行為，我知道後果嚴重，佢跌咗落地，我即時向佢道歉。我同佢講，點解大家變成咁？話佢成日搵交嗌，又唔返英國，佢同我講數，話自己唔會返英國，除非即刻註冊，佢話我依家六十幾歲，搵錢能力愈來愈低，呢間屋就係最值錢，如果唔結婚就加佢個名，同埋所有附屬卡都要，即係想分我身家。（期間胡漢清不時拿出雙方律師的對話文件，清楚證明事實。）

談判不果，江希文開始不斷將自己受傷照傳給其他人，胡漢清不甘示弱，到養和醫院驗傷，亦自拍受傷照，自此，胡避免直接衝突，就透過律師傳話，亦有叫江欣燕幫手。胡漢清指「老屈」事件陸續有來，包括指他不喜歡江欣燕。

畀人屈到失控

胡：我最憎畀人屈，我點解會做律師，就係因為我細個畀人屈，所以邊個人屈我，我就唔得，亦都令我會好嬲，佢就最鍾意屈我，令我情緒激動，我係被佢逼到失控，然後就錄我音裝我。佢屈我唔鍾意江欣燕，認真莫名其妙，我後來同江欣燕仲多嘢傾過同佢，江欣燕之前離婚都有問我有冇律師介紹？Liz喺英國時，我喺香港有時間就約佢屋企人出嚟食飯，江欣燕都在場，有晒相證明。不過最離譜嘅老屈事件係2014年十二月，我屋企漏水，我就搵相熟師傅嚟整，佢見到就發火，話我容許陌生人喺屋企出入，又話裝修工人偷窺佢，佢要求換鎖，或者等佢搬走之後先整，師傅發咗律師信畀佢，亦都唔接呢單裝修，維修冇做，佢竟然走咗去食環署投訴我，造成公眾衞生，要對我作出檢控。佢嘅手法好陰險。

記：咁你依家想佢搬離大宅？

胡：我從來冇叫過佢搬走，我只希望佢喺自己範圍生活番，佢依家成間屋周圍霸，我同啲仔女都住唔到，又話人身有安全威脅。我同佢爸爸有傾過，佢爸爸係好贊成Liz同個孫女搬番去住，而沙宣道亦預留一個房畀佢同個女，但佢係都要話同個女搬出去，要求龐大生活費，佢爸爸都贊成，個孫女有公公婆婆照顧，比佢一個人同女喺出面住係好，但佢唔肯。