潮流興「賣肉」，藝人林盛斌亦趕上Sell「肌」的尾班車，日前他穿上逼爆機師裝大賣苦苦得來的另類「腹肌」，以全新「米芝蓮」造型示人，獲網友讚型爆！

穿上逼爆機師裝的Bob戴埋黑超影相，使唔使咁Chok呀！

最近娛樂圈掀起一股「肌男」熱，黃宗澤、張繼聰及林子善等型男相繼Sell「肌」，密密操肌的他們更不時發放粉絲福利，開心Share六舊腹肌的成果，令粉絲流晒口水！

着咗陳法拉件衫

而一向走搞笑路線的林盛斌（Bob），亦捨棄象徵「有福氣」的圓潤身形，有樣學樣跟風做肌肉男，大賣另類「腹肌」！Bob日前為新劇試造型，穿上威風凜凜的機師服裝，本應英姿颯爽的他卻因恤衫尺碼不合，幾乎逼爆恤衫鈕！被貼身恤衫逼出一截截「腹肌」的他，不禁在微博笑問：「服裝部嘅同事，請問你係咪攞咗陳法拉件衫畀我着呢？」

難得「賣肉」的Bob，獲網友一致讚好，更留言取笑他似足「米芝蓮」公仔，連好友沈震軒亦留言大讚：「Captain Bob的肌肉真係好吸引！」這身脹爆飛「肌」Look，相信連「Cool魔」張智霖和「Sam哥」吳鎮宇亦要畀個Like！