余文樂（樂仔）昨日於九龍灣宣傳新戲，期間談到舊愛吳雨霏即將結婚，樂仔大方送祝福；他同時否認與好朋友杜如風「撻着」，更直斥「離晒譜」！

單身的樂仔表示暫以工作為先。

樂仔稱與杜如風是好友關係。

樂仔祝福前女友Kary結婚快樂。

近期娛圈喜事連連，日前本報獨家披露吳雨霏（Kary）與「網球王子」洪立熙赴美訂婚，並將於今年八月「升呢」做人妻！前年與Kary分手的樂仔昨日於九龍灣宣傳新戲，他既祝福舊愛，又自爆曾經心急結婚：「恭喜，祝福！（仲有聯絡？）冇。（會否心急結婚？）急過咗龍就唔急，急過一排係想（結婚），但過咗一排就知道冇得急。好似好急去廁所但搵唔到，急完就唔急。」

緋聞女友就結婚

樂仔又大呻難識新朋友：「我參透到個死因，我識唔到新朋友，放工就返屋企，出街都係見舊朋友。（之前同混血模特兒傳緋聞？）好耐啦，人哋都就嚟結婚。（媽咪叫你去相睇？）佢放棄咗我，佢都就嚟抱孫，我唔諗（結婚）喇，做嘢先。」

讚杜如風有義氣

談到日前與杜如風傳出緋聞，樂仔否認拍拖並公然「護花」：「離晒譜，我哋係一齊去京都，係識咗好多年嘅好好朋友。佢呢排好慘同難受，我都要安撫吓佢。（佢同郭子健撻着？）我唔問私人事，但女流之輩會脆弱啲，好緊要。（緋聞）係笑話一則，佢人品好又有義氣，好似個男仔咁。」