劉嘉玲前晚與梁家輝及謝君豪為第三度公演的舞台劇《杜老誌》進行首場演出，嘉玲承認面膜生意獲投資者入股2億，做生意頭頭是道的她否認會棄演從商，但已計劃推出男士護膚品，更指老公梁朝偉是她的白老鼠！

嘉玲唔單止舞台劇演出成功，連做生意都咁掂！

嘉玲笑言要為君豪搞男士護膚，更想找家輝拍廣告。

劉嘉玲、梁家輝及謝君豪前晚在演藝學院演出由英皇娛樂主辦、毛俊輝執導、梁李少霞監製的舞台劇《杜老誌》，吸引蔡一傑捧場，張學友、羅美薇及甄楚倩送花籃祝賀。三位主角演出後受訪，家輝說：「我收到風有人嚟睇過，好似想將個劇搬去外埠做，依家考慮緊！」君豪說：「香港暫時應該唔會再做，出埠要集齊成台戲五、六十人，要夾個期好唔容易！」嘉玲說：「我哋呢三次演出大家都喺齊度，我都推咗好多嘢，因為要尊重表演藝術。」

睇中家輝拍廣告

嘉玲在劇中令鞋業生意起死回生，現實中亦將面膜生意點石成金，對於獲投資者入股2億，她坦承：「係有咁嘅事，但初步傾未正式簽字。（做生意好成功？）只係做咗3個月，冇諗過咁好反應。本身對化妝、護膚、美容都有心得，都有畀意見包裝推廣，想搵梁家輝拍廣告！（喺微博放素顏相被讚勇敢？）化唔化妝都要面對真實嘅自己，素顏有素顏靚，一起身化行個妝隔籬嗰個都驚啦！（鍾意做生意多過演戲？）唔會，我好享受舞台上每秒鐘，生活同做戲只要投入同Enjoy，係會做得好嘅！」

為君豪製「男士專用」

君豪問嘉玲會否推出男士護膚品，嘉玲說：「為咗你即刻出！」家輝則大讚嘉玲又靚又有生意頭腦：「好多人唔敢素顏，但嘉玲姐點同！（有護膚心得？）我幾十年嚟都唔用！」嘉玲即勸說：「咁你要用！（梁朝偉有用？）梗係，佢係我嘅白老鼠！」