前無綫主播黃紫盈前年毅然請辭，搖身一變進軍娛樂圈做主持及司儀，實行作多方面發展。她坦言一年之間轉變甚大，當中雖有壓力及挫敗感，但決不放棄，希望拍劇豐富人生，打拚出精彩的每一頁！

甜姐兒黃紫盈正努力學習做一個完美的司儀。

口齒伶俐的黃紫盈（右一）為有線節目擔任嘉賓。

黃紫盈（後排左一）累積不同範疇的工作經驗。

擔任活動司儀時，黃紫盈可親身與觀眾作出互動。

獲得入娛樂圈這張門票，黃紫盈決心努力闖出一番成績。

回望過去，黃紫盈無悔離開工作四年的無綫新聞部。

毅然辭任無綫主播的黃紫盈，現時是一位自由工作者。

黃紫盈最愛大笑，但笑到體溫上升時卻會出紅疹。

以往在電視的新聞報道上看到黃紫盈（Connie）的身影，字正腔圓的她總在說：「大家好！我係黃紫盈。」然後專業地唸出各地大小新聞，不過在2013年，有指她被張文采欺壓，因而在鏡頭前含着眼淚報新聞引起熱話，Connie事後離開効力四年的無綫新聞部，搖身一變成為自由工作者，更踩過界殺入娛樂圈！

萬事起頭難

事隔一年，Connie變化很大，她甜笑指接觸了不同範疇的工作，令她嚇了一跳：「唔經唔覺我已經做咗一個自由工作者一年，做過節目主持、司儀、拍過廣告同做公關，好似比我過去四年喺無綫嘅挑戰仲更加多！（最鍾意邊一方面？）司儀同節目主持，因為之前我喺公仔箱入面，對鏡頭好似講古仔畀觀眾聽咁，感覺好冷冰冰！依家就唔同，要睇埋即場氣氛，同觀眾要有互動，感覺好似特別興奮，自己都好適合同好享受喺台上做司儀。」Connie坦言做司儀時最愛有突發事件，可趁機訓練轉數：「之前做主播就冷冷靜靜，喺鏡頭面前好正經咁讀新聞，但做司儀就有好唔同嘅變數，所以我要執生，但當完成一個Event我就好有成功感！」

由主播變成藝人，問到Connie會否有壓力？她說：「其實係有嘅，呢一年我都唔係好摸清我係藝人定主持人，因為覺得自己唔係叫藝人，而係一個主持，咁樣諗我會舒服啲！」不過工作環境及模式有所改變，正在重新適應的她正摸索最佳的工作模式：「之前做主播講錯嘢，我哋就會收到好多投訴，所以我哋會特別小心。依家工作，有時眼見好多嘢可以做好啲，但因為活動上資源有限，所以有時唔可以咁完美，呢一方面我係會有少少挫敗感！」

唔慣被偷拍

　　縱然工作上有挫敗感，但她卻從未後悔離開：「人要向前看，過去一年嘅挑戰真係好似重新讀過大學咁，我諗我會繼續做呢一行。但暫時唔係好慣會有狗仔隊跟，因為我唔需要工作就會變得好懶，素顏出街可能會畀人影到，呢一方面要好好去適應！」

Connie希望新一年繼續朝司儀這個目標發展，嘗試不同類型的工作：「接觸多啲唔同司儀嘅工作，自己都好想繼續喺呢行鍛煉一下。（拍電影？）太難啦！我又唔係演戲出身嘅，我又冇咩經驗。我曾經有個機會去做舞台劇，但因為工作上安排，所以無法完成，但如果真係有機會，我都真係好想去試吓，因為演戲都可以訓練自己！」

後記 笑到出紅疹

每次做訪問時，開心果Connie總是笑個不停。訪問後卻發現她的面部及頸部均出現「紅疹」，恍如皮膚敏感，當小記向紫盈「慰問」時，她解釋：「我一笑就會咁啦，同埋可能太熱，所以先咁樣，過咗一陣就冇嘢！以前我報新聞都會有咁嘅情況，不過我會塗好厚嘅粉遮住，我頸嘅粉底仲厚過塊面，所以大家睇唔到！」

Profile

姓名：黃紫盈

出生日期：1987年7月19日

學歷：大學畢業