蕭正楠（Edwin）前晚出席《仁濟慈善雙周2014慶功宴暨頒獎禮》時，被問到如何與女友黃翠如共度首個情人節？他笑說：「我哋好簡單，做嘢寓工作於娛樂。情人節未必有假放，二月又開始開新劇。（農曆新年帶女友見家人？）佢屋企多長輩，睇吓有冇時間分畀我啦！（你去探佢長輩？）咁要睇吓佢有冇邀請，唔會貿貿然去，我都好高貴o架！」他又指劇集《師奶MADAM》播出後，女友的家人認識了他更多。問到劇中不少欺負翠如的劇情，會否擔心有負面影響？他說：「蝦得佢好緊要，但戲入面後尾會愈來愈愛。（真人呢？）OK嘅，Stable（穩定）啦！」

蕭正楠表示與女友黃翠如感情穩定，愈來愈愛。

同場的「仁濟之星」麥長青（麥包）表示主持的節目《明星愛廚房》有意添食：「我呢個節目好似朋友食飯，好有親切感。想請草蜢但佢哋度唔到期，又想請江美儀、伍詠薇。」兒童節目出身的他建議無綫翻拍節目《麥偵探》：「但唔係畀小朋友睇喎，係畀番我哋咁上下年紀睇，集體回憶嘛！」