自小受爸爸薰陶的新進歌手謝偉倫，完美複製爸爸謝昭光走過的路。兩父子同樣愛夾Band，其後隻身走到歐洲流浪，再加入樂壇。不同的是爸爸最後黯然離開樂壇，十多年後的今天由謝偉倫延續父親當年未走完的路！

Alan希望延續爸爸做歌手的夢想，決心要一闖樂壇。

Alan（右）和爸爸齊Jam歌，勁！

謝偉倫（Alan）和爸爸謝昭光是音樂上的最佳拍檔，一拎起結他即Jam個不停。他們收藏超過20支結他，謝昭光說：「我哋個身一定孭住支結他，去到邊都帶住佢。」Alan卻有慘痛經歷：「有次坐飛機佢一定要我哋將結他寄倉艙，結果壓爆咗，裂開咗個『肚』，不過我哋整番好！」現從事設計的謝昭光得意地說：「我哋搵啲漿同灰補番，然後再畫番一條條木紋出嚟，好似有個痕迹仲威水！」

老竇轉戰澳門

謝昭光現時長駐澳門做生意，但十多年前，他和Band友被唱片公司睇中簽約出碟，可惜最後因發展欠佳令他對樂壇心灰意冷，他說：「1997年我離開咗樂壇，嗰陣非常失落，灰到唔聽收音機、唔睇電視，仲過咗澳門，所以我成日畀心理準備個仔，好多人承受唔到呢樣嘢。」他又指當初也抗拒Alan入行：「成日話畀佢聽要承受好大嘅嘢。」

逼員工學樂器

不過Alan亦遺傳了爸爸倔強的精神：「其實佢識好多圈中人，講一聲就可以幫我入行，但佢就由得我，不過我唔試過唔心死。」他又踢爆父親即使到澳門重新發展，也沒有放棄音樂：「佢會逼公司每個員工學樣樂器，開開吓工就Jam吓！我係延續緊佢，可能真係流住同一樣血，所以思維好似。」