冼國林自從與徒弟杜宇航不歡而散後，再次簽了18歲的新人沈良杰，他大讚對方夠純品兼勤力，有望成為「武打林寶強」及「靚仔王祖藍」！　

年僅18歲的Kitson望以武打闖出名堂，向王祖藍挑機！

想同我鬥？（設計對白）

愛徒心切的冼國林（右）親自對Kitson作出指導。

經過一年相處，冼國林正式簽Kitson為旗下藝人。

陳嘉桓師弟沈良杰（Kitson）繼演出電影《迷離夜》後，即將在新片《大浪淘沙》飾演影后鮑起靜的孫兒、一位從內地來港的新移民，電影會帶出不少中港矛盾。Kitson透露拍攝期間鮑姐細心教戲，無論戲裏戲外亦對他呵護備至：「鮑姐同我講，做演員要養好習慣，要有足夠休息，唔好周圍去玩！」

唔靠樣搵食

年僅18歲的Kitson仍然在學，約一年前他透過朋友認識到經理人兼師傅冼國林，他倆互相了解後才正式簽約，其後Kitson正式拜冼國林為師，學習洪拳與長拳，他說：「識到師傅，我覺得好好彩！師傅係大老闆，竟然肯教我呢個平平無奇嘅小朋友，師傅對我係嚴，例如我打拳嘅動作，佢會執我執得好仔細！」問到是否想做武打新星？他說：「我知道係好辛苦，不過我覺得堅持就可以應付到，我知道呢條路好難行，但武打係真材實料，唔係靠樣搵食！」

冼國林對徒弟讚不絕口，他表示Kitson相當純品及勤力，起初他只安排Kitson學了兩天洪拳，後來Kitson卻主動要求學足四日，故此他認定Kitson有上進心及自我要求高，便正式簽約收為旗下藝人及徒弟。過去曾與徒弟杜宇航不歡而散，提到收徒弟會否有所顧慮？他直認不諱：「有！我怕咗！我同其他經理人唔同，簽咗返嚟唔係當商品，而係親人！」至於與杜宇航如今關係如何？他說：「已經冇來往，佢都係我教出嚟，我都想佢好，但大家想法唔同！」

挑戰王寶強

談及對Kitson有甚麼期望？他說：「我希望佢學好功夫，我想佢咩都試，唔好定型，要做嘅係武打演員，而唔係動作演員！佢可以係打得嘅王寶強，又可以係靚仔版嘅王祖藍！」