靚聲爵士小天后胡琳化身為跌落凡間的天使，相隔6年再度推出原創大碟，更憑歌寄意呼籲男生勇敢追求自己，繼續為愛情努力，誓要尋找到愛情裏最閃亮的星星！

胡琳在新碟中首次親自作曲，心情緊張又興奮。

胡琳相隔6年再出碟，更憑歌寄意呼籲男生勇敢追求自己！

被譽為爵士樂的靚聲小天后胡琳（Bianca），相隔6年推出全新廣東原創碟，一直推出國語及翻唱碟的Bianca表示，今次對她來說有非一般的意義，由於首次親自作曲，所以心情既緊張又興奮：「我真係恨咗好耐，當係自己嘅BB仔出世！」

Bianca透露一直有很多人鼓勵她嘗試作曲，但卻大呻辛苦及未開竅：「其實腦裏面一直會出現一啲Melody，但認真搵靈感就要困住自己，試過喺就瞓着嗰刻，突然間靈感到，即刻爬起身錄低佢！」她坦言以前做音樂只是一種責任，今次作曲後感到很有趣的事，以後有望參與更多製作方面的工作。

擇偶注重相處溝通

談到首次作曲，Bianca很滿意，希望歌曲能夠慰藉歌迷的心靈：「好似飲咗心靈雞湯咁，聽完可以舒服啲，成為大家感情嘅出口。」收錄的情歌都是原於親身經歷，她表示要經歷情傷才可以將真實感覺帶給大家，她說：「新碟裏面有首歌係希望講畀追求緊自己嘅男仔聽，可以放膽啲，唔好顧慮咁多！」

到了適婚年齡還未有着落，Bianca指家人非常着急，但她相信緣分，更會積極為自己爭取：「依家鼓勵自己作吓曲先，希望可以尋找到閃亮的星星！」提到理想對象時，她要求不高：「隨住年紀而改變，以前淨係鍾意靚仔，依家在意日常相處及溝通，希望可以搵個可以依靠嘅人。」

紐約玩快閃被驅趕

對於今次遠赴紐約拍MV，Bianca指過程刺激，並與當地一班Dancer在不同地方玩快閃，期間還遇到警察驅趕。她表示很喜歡唱片封套的造型：「感覺超現實，我好似跌落凡間嘅天使！成日同人講我係外星人，好似要返太空咁！」另外，提到有關與大名娛樂解約的事，她澄清今次出新碟與大名娛樂無關，更覺得報道匪夷所思，她說：「有好多傳言，愈解釋就愈亂，如果自己冇做過或者身邊嘅人都冇做啲會佔人便宜嘅事就OK，只要唱片出到，有知音人就夠了。」