去年靠「震波猜枚」食胡的新進「飛躍進步男藝員」張繼聰，因大晒六舊腹肌而吸納大批粉絲。願意為演戲豁出去的他笑言要「脫」得有價值，不想淪為「脫星」！

Louis甘願為演戲犧牲，但卻不想淪為「脫星」。

Louis憑劇集《老表，你好hea！》爆紅，更因大晒六舊腹肌而吸納大批粉絲。

Louis為拍《食為奴》而剃頭也毫不介意。

張繼聰（Louis）去年憑劇集《老表，你好hea！》爆紅，更因騷肌大玩「震波猜枚」，令女性粉絲流晒口水！「騷胸」形象深入民心的Louis透露，為演戲願意豁出去：「我唔係嗰種會無啦啦除衫嘅人，但係要為角色去服務，角色需要咪做。拍《食為奴》要剃頭就剃頭，個角色要睇多啲歷史知識，咁我咪睇，呢個係演員嘅工作一部分，所以冇乜特別大感覺。」

雖然未有「封胸」打算，但他笑言要「脫」得有價值，不想變成「脫星」！他說：「要睇角色同劇情，如果冇特別原因，我唔介意，但係亦都唔想變做脫星。」

拍攝前做足功課

演藝學院畢業的Louis可謂「演乜似乜」，他笑言只是事前為角色做足功課。問到最想挑戰的角色時，他直言不敢「揀角色」：「我有好多角色都係未試過，講真，我覺得每一個角色都難，暫時未去到嗰種級數，夠膽講『我覺得Handle到，唔做喇』，唔係，我覺得全部都Handle唔到，所以真係冇諗，每一次嚟到都要做功課。」

近年興起北上拍劇搵「人仔」，雖然Louis有意參與內地製作，但因今年檔期排到密麻麻，惟有先留港打好基礎。

演警察被打到入院

此外，張繼聰昨日為無綫劇集《逆戰塘西》拍攝一場落雨追逐戲而成身濕透：「呢套劇都好難忘，成日都要吹風、好凍咁拍攝，都有試過吹到頭赤。」劇中雖是警察，但經常被打，他笑說：「我平均五集就要入一次醫院！」本月11日剛過生日的他更有神秘驚喜：「嗰日喺屋企食完飯慶祝就去開工，都奇怪楊明叫咗我去一邊傾啲好感性嘅嘢，出嚟原來劇組準備咗同我慶祝生日，連我老婆同個仔都嚟咗，好驚喜感動。」