舒淇與曾演《哈比人：荒谷魔龍》和《狂野時速6》的35歲荷里活男星Luke Evans昨日為BVLGARI全新香港旗艦店開幕擔任剪綵嘉賓，Luke與舒淇老友鬼鬼，只見舒淇不時拉實Luke手臂，Luke又輕攬舒淇纖腰，被大班粉絲包圍的他們興奮得指手畫腳。舒淇欲拾起地上的生菜時倒出半胸，就連品牌高層Bulgari行政總裁Jean Christophe Babin和大中華區及澳大利亞董事總經理平興韜亦未能抵擋其電力，Jean貪玩地將剪綵絲帶披在舒淇肩上，令平興韜不禁大笑。首次來港的Luke大讚舒淇美麗及友善，看過舒淇Instagram的他說：「佢Followers多過我，佢一定出名我好多！」

Luke輕挽舒淇纖腰，羨慕死人！

靚仔當前，舒淇忍不住出手捉實Luke手臂。

Luke（左一）、舒淇與Bulgari兩位高層齊齊剪綵。

愛貓轉黐馮德倫

舒淇亦稱讚Luke靚仔險被電暈，對於Luke曾承認是同性戀者，她說：「係咩？冇所謂，咩人都好，最緊要善良同靚仔，哈哈！」有傳她參與的內地節目《最強大腦》酬勞達一千萬人仔，她風騷地指酬勞夠買手上名錶，提到與男友馮德倫的關係，她依舊以好朋友相稱，但承認對方經常照料愛貓，貓兒變心卻令她呷醋。