宇宙最強的甄子丹原來是個路盲！他昨晚與太太汪詩詩出騷時自爆駕車經常迷路，又試過去錯停車場搵車搵足三小時，笑言很冇面！

子丹自爆與詩詩拍拖時的瘀事。

玩具大王蔡志明孻仔蔡加讚旗下的「KCP Auto Plaza九龍城汽車廣場」昨晚舉行開幕活動，蔡家幾乎總動員支持，包括加讚及太太汪圓圓、父母蔡志明及蔡李惠莉、兩位家姐蔡加敏及蔡加怡、兩位姐夫馬鴻銘和陳漢驄，還有圓圓家姐汪詩詩及姐夫甄子丹。子丹說：「我鍾意睇靚車，但係我唔揸，因為驚超速，同埋我成日蕩失路。（路盲？）記得同詩詩拍拖時我揸咗一個鐘都去唔到我屋企，嗰時住喺美國，真係覺得冇晒面。」詩詩笑說：「拍拖唔可以暴露脾氣，後尾我話不如試吓右轉！」

搵車搵足三個鐘

子丹繼續大爆瘀事：「試過喺停車場搵咗3個鐘都搵唔到架車，發現去錯停車場！依家都係畀詩詩揸，但係我泊車好叻，可能同功夫有關，好似打詠春。」他又自詡記電影叻，更成功指出錯處避免穿崩！他透露三月中開戲，明飛北京工作，後日可能到澳門出席華鼎獎頒獎禮，農曆新年會與家人度歲。

汪圓圓新手媽咪

而產後四個月的圓圓已收身不少，但她仍嫌未夠：「本來未Ready出嚟，不過梗係要支持老公。（點樣減？）湊BB係最好嘅方法，BB好大隻，依家四個月大，重15磅，抱佢抱到成隻手好似抽筋咁！」又問加讚可會呷醋，加讚說：「梗係唔會！我放工返屋企都係陪BB，等佢瞓咗先二人世界。（圓圓收身夠未？）夠喇！太瘦人哋會以為個老公刻薄佢唔畀飯佢食。」