恭喜恭喜！藝人岑潔儀昨日在老公Dixon陪同下，於凌晨時分順利誕下7磅B仔Damian Chin。接受半身麻醉手術的岑潔儀，受訪時坦言生B過程輕鬆：「我覺得好似發咗場夢咁。BB一出世嗰下，感覺好難忘、好神奇，我即刻喊咗出嚟。我老公一路喺身邊拖住我，所以我一啲都唔驚。」雖然她十分淡定，卻踢爆老公驚到震：「佢剪臍帶嗰下好搞笑，因為佢好緊張，好彩最後都好順利。」問到BB似邊個，她冧爆說：「似爸爸，成個餅印咁！」又透露會餵人奶，並於周六出院。

岑潔儀抱着囝囝，又有老公Dixon錫錫，一臉幸福。

準備分娩的岑潔儀心情緊張，幸有老公傍實。

岑潔儀

洗定頭入院

而前晚入院生B前，岑潔儀雖然心情緊張，但仍甚有「閒情逸致」，不但花時間敷Mask及按腳，更專誠到Salon洗頭，她說：「因為坐月，我諗住成個月唔洗頭，咁出去洗會徹底啲同乾淨啲，我要成為最潮大肚婆。」而Dixon則笑說已準備神秘禮物獎勵老婆，氹得她驚喜大叫！