金球獎政治化！榮獲金球獎事業成就獎的佐治古尼偕人權律師老婆Amal恩愛現身，二人帶頭戴上「我是查理」的襟章，與眾星隔空聲援上周被襲的巴黎《查理周刊》兼撐言論自由！

佐治古尼奪事業成就獎，既講時事，亦不忘發表愛的宣言冧老婆。（美聯社圖片）

Amal的手提包扣上「我是查理」襟章，但不及其「石膏」手套引人注目。（美聯社圖片）

海倫美雲（美聯社圖片）

戴安古格手持標語，隔空支持巴黎遇襲的雜誌社。（美聯社圖片）

荷里活型佬佐治古尼（George Clooney）婚後首次孖老婆Amal出席大型公開活動，拖手現身金球獎紅地氈，粉碎情變傳聞，而不時為人權發聲的兩人分別於胸前與手提包扣上印有「我是查理」（Je Suis Charlie）字樣的襟章，追悼巴黎《查理周刊》（Charlie Hebdo）總部槍擊案的罹難者及捍衞言論自由，不少影星如戴安古格（Diane Kruger）、嘉菲碧絲（Kathy Bates）及謝勒力圖（Jared Leto）等亦分別戴襟章、持標語及開腔力撐，影后海倫美雲（Helen Mirren）更於晚裝扣上原子筆，象徵言論自由！同場的荷里活外國記者協會主席Theo Kingma致辭時說：「我哋會聯手撐言論自由，於任何地方、由北韓到巴黎都係。」獲全場站立拍掌喝采！

為索尼事件做「和事老」

另外，獲頒施素德美事業成就獎的古尼發表得獎感言時，再開腔撐全球的反恐大遊行：「今日係一個唔平凡嘅日子，數百萬人喺巴黎及世界各地遊行，有唔同宗教信眾同各國領袖參與，唔係為抗爭，只為支持『我們不會於恐懼中前行』嘅理念，我哋唔會恐懼，我係查理。」此外，古尼亦化身索尼黑客事件的「和事老」，笑言既然人人都被爆對話內容，那頒獎禮正好讓大家為說過的事道歉。

老婆被嘲似打石膏

而穿上婚禮西裝的古尼亦不忘發表愛的宣言，並幽默地說：「我過咗好好嘅一年，當然唔係講緊我套《古文明救兵》（The Monuments Men）嘅評語，係想講搵到所愛嘅人係件震撼人心嘅事，Amal，無論係咩令我哋走埋一齊，冇嘢比可以成為你老公更加驕傲！」宣言感動全場，鏡頭即對準甜笑的Amal，Sweet到漏！

不過，第一次出席金球獎的Amal以露膊復古Look上陣，雖被英國《每日郵報》（Daily Mail）形容為新版柯德莉夏萍（Audrey Hepburn），成為新時尚指標，惟另有傳媒批評其打扮老土，更指其白手套似打石膏！兩夫婦在紅地氈受訪時被追問有否生B計劃時，Amal即笑說：「你仲衰過我阿媽！」