鄧紫棋（G.E.M.）為以最佳狀態示人，不惜搏命鍛煉，除出街都「磅不離身」，嚴格控制熱量外，她昨日上載身穿小背心及超短褲的健身照，更無懼危險，穿上內增高波鞋舉槓鈴。相中的她擺出收腹、趷籮姿勢，驕人身材引起關注，但亦有網民擔心她穿內增高波鞋做運動會容易受傷。不過G.E.M.回覆：「着呢種鞋健身辛苦過普通波鞋，但舞台上一定係着高踭鞋，所以我開始所有鍛煉無論係跳舞定重量訓練，都係着高踭鞋做。唯一例外嘅係跑步。而且我着高踭鞋做嘅時候，一定都係有教練喺旁邊。」

擁有健身教練牌照的趙勁皓，對於穿內增高波鞋健身表示一定要有教練在旁：「着高踭鞋做呢啲深蹲嘅動作會令重心放前咗，如果做得唔正確就會傷到膝頭，對脊椎骨都會有影響。」