無綫藝人蕭正楠和黃翠如昨日宣傳新劇，自爆穿上女友送的「潮男恩物」外，又大唱冧歌向翠如表白：「我永遠屬於你。」眾演員又將「如楠戀」擺上枱，祝福「一對新人」百年好合之餘，又迫兩人練習交杯對飲，十足預演婚禮！

蕭正楠和黃翠如被追問何時結婚，又獲大家祝福百年好合，永結同心！

翠如與蕭正楠谷劇時玩到面貼面，奉旨談情。

黄智雯和曹永廉玩遊戲時，被蕭正楠捉弄一番。

蕭正楠與黃翠如昨日宣傳新劇《師奶Madam》，拍檔曹永廉和黃智雯擺「如楠戀」上枱，安德尊以「一對新人」介紹他倆出場，趙永洪又問何時結婚，蕭正楠尷尬說：「結咗婚啦！喺戲入面！」當演員交杯對飲時，翠如怕醜拒飲果汁，阿廉打趣說：「你哋都要練定！」之後兩人獲大家祝福「百年好合，永結同心」！

着「潮男恩物」晒愛

談到兩人相當甜蜜，翠如笑說：「唔係，我哋好憎大家，喺戲入面。（現實呢？）我好入戲，依家好不和。」提到二人劇中不乏打交場面，問是否錫住女友打？蕭正楠說：「完全冇，好難打，佢骨巉巉咁，打完仲痛過佢。依家好啲啦！佢肥咗3磅，我就肥30磅，成日帶佢去食好多嘢，但佢都唔吸收。」傳劇集因緋聞而押後播出，他說：「劇幾時播係公司安排，但情人節前播都係個好Timing。」

蕭正楠又自爆穿女友送的白波鞋：「我好重視呢個記者會，連佢送我嘅聖誕禮物都着埋出嚟，係潮男恩物。」隨後上台大合照時，打算踎在前排的他突然大叫：「對鞋唔屈得，係禮物嚟！」

他們又盼情人節一起在工作中度過，問到送甚麼禮物給女友？蕭正楠笑說：「呢首歌囉，叫《I always be yours》，即係我永遠屬於你嘅，咁有意義仲唔收貨？」翠如亦大讚對方唱得好， 更在台上借粉絲的花送給男友。

黄智雯色誘阿廉

黄智雯則透露會穿性感睡衣，色誘懷疑「不舉」的老公阿廉，至於會否比《飛虎Ⅱ》着Bra一幕更性感？她說：「呢個勁啲，我會着吊帶喱士跳舞誘惑阿廉。（拍攝時尷尬？）我見阿廉有少少手震、出晒手汗。」