伍靜麗小鴨變天鵝

身高一米八的伍靜麗（Angie）自小就「高」人一等，卻從未想過「我要做Model」，如今回想當初，她勢估不到自己由昔日的醜小鴨，竟變成今日在舞台上的天鵝，她表示高中時在超級市場內被星探發掘：「我以前高得嚟好大隻，皮膚又黑，感覺好Tomboy，我都唔明點解會話我有Potential（潛質）。既然有人問到，我又覺得模特兒行業幾得意，咪返屋企問准媽咪，點知畀佢鬧到我一面屁，叫我死咗條心，諗都唔好諗，讀好書先再講喎！」

兼職賺錢

Angie選擇做個乖孩子，聽從媽媽的話努力讀書，最後考獲好成績，更遠赴英國升讀大學，修讀法律課程，誰知機會再一次找「她」，Angie說：「我當初都放棄咗，冇諗過會喺英國街頭再被星探發掘，今次我為自己做決定，邊讀書邊兼職模特兒工作，當賺吓外快，幫補學費同生活費，點知愈做愈上癮，真係做得好開心！」

她坦言五光十色的模特兒行業，不僅可以接觸不同範疇工作，更可與不同個性的藝術創作者合作，令她獲益良多，擴闊視野。

學戲增值

在大眾眼中，模特兒的工作是「影靚相」、「行天橋」，賺快錢很容易，實情是否如此？Angie坦言是表面亮麗，她解釋：「其實每份工得來不易，要經過一輪試鏡再篩選，有時真係試鏡十次就被Out十次，嗰種挫敗感唔係筆墨可以形容到，承受壓力好大，所以做Model，唔單止要有外表，仲要喺心理上作出相對調節，總之時刻都要裝備好自己，內外都要保持一種『強』嘅狀態，真係唔可以鬆懈。」

模特兒工作往往是朝不保夕，也處於被動狀態，Angie很清楚不能作為自己的終身職業，與其為日後擔憂，倒不如現在學戲自我增值，她說：「知識學到係自己，冇人可以攞走，我覺得學多一樣嘢都無妨。點解我突然會跟老師學戲？其實學戲對模特兒工作有直接幫助，令到自己喺台上表演同面部表情更收放自如。」

愛拍電影

話雖如此，若然有戲接拍會否答允？她聽罷想也沒有多想，裝出一副天真樣子笑着說：「若然機會到，Why Not？」她補充說：「之前我喺上海接拍類似微電影嘅廣告，一日有唔同感情線，喜、怒、哀、樂都有齊，我冇拍過戲，起初都無所適從，好彩一班工作人員教導下，我好快投入角色，仲愈演愈出色，就連導演都讚我有演戲天分，但佢講笑咁話我太高，難搵對手，如果戲裏冇男主角，只有我一人做戲仲啱晒喎，哈……」

曾踏足倫敦時裝舞台的她，希望重返國際舞台，內外已投入作戰狀態，再次向理想進發：「時間唔等人，況且我年紀漸大，唔可以再得過諗字，一諗就會再拖，我都唔想將來後悔！」

模界高材生律師牌揸手

Angie從小酷愛藝術創作，長大後，藝術仍沒有離開她，當上模特兒的工作令她常常有機會接觸不同性質的藝術工作者：「每個藝術創作者都好有個性，我好欣賞佢哋源源不絕嘅創作頭腦，真係好犀利！」

她坦言沒有後悔放棄當律師：「我覺得模特兒生活多姿多采，趁後生咪繼續Fun，而且又可以令我眼界擴闊。畢竟知識學到係自己，或者有日唔做模特兒，我有律師牌，可以做番律師，都係一個保障。」Angie確是模特兒界的高材生。

後記：性格傻Cool Cool

第一次見Angie時，感覺她有種Cool味，但言談間，會發現她很親切，還像個傻大姐，畢竟模特兒事業都算是半個娛樂圈工作，難免在人際關係或工作環境方面都略為複雜，入行至今，她的思想仍保持一份童真，還有話直說，保持真我態度，實在難得。