苟芸慧、馬德鐘及胡定欣等昨日到觀塘為《飛虎Ⅱ》今晚播出的大結局造勢，苟姑娘自爆正進行斷食計劃：「斷食為期七日，只可飲水。（斷食為拍劇？）公司通知咗我可以返去聽新劇古仔，我想快啲調理好身體，唔止大家心急，我都心急，之前食西藥，個人好腫，所以盡量用啲接受到嘅方法囉！我完咗斷食至會開劇。過來人話第二、三日最難捱，今日係我嘅第二日斷食，So Far冇乜嘢，我精神好好呀！」

圓碌碌的苟芸慧已開始斷食，精神不錯！

馬德鐘與胡定欣撞嚟撞去，落力宣傳。

馬德鐘透露北上新發展：「我會簽約上海經理人公司，希望發展空間更大，酬勞好滿意，5號舉行盛大簽約儀式，稍後去越南拍紀念中越建交電影，得我一個香港演員。第時TVB有啱嘅劇本可以傾合作。（太太跟埋你搬上內地？）唔會！我有工作至返去，一直喺香港住。」定欣說：「終於等到大結局，我同鍾嘉欣有好多粗豪打鬥戲，我唔係好敢打，怕整親佢。今次係我繼《衝上雲霄》後再同馬德鐘對戲，相隔12年，但佢係我哥哥嘅感覺仍然抽離唔到。（佢簽約內地經理人公司？）睇吓有冇啱我嘅Job彈畀我啦！有啱嘅劇本，佢都會返TVB拍劇嘅！」