張智霖昨晚出席續約活動，據知老闆蕭定一以三年1億的酬勞及分拆新公司股份和委任CEO職銜「利誘」他續約，張智霖變相三年進帳2億。

Chilam以大亨造型出席續約儀式。

Chilam獲蕭定一送贈寫着「The Great Chilam」字樣的牌匾。

張智霖（Chilam）去年與蕭定一簽約加盟旗下，事業更上一層樓，昨晚他出席《中國3D數碼娛樂有限公司3週年晚宴暨張智霖續約儀式》，宣布續約加簽三年合約。據知，蕭定一今次出動「三年1億」的酬勞游說外，又計劃分拆一間全新的經理人公司，2、3年後便會上市，並將分配新公司的一半股份給Chilam，安排他出任新公司CEO，屆時便與年輕CEO謝霆鋒睇齊。保守估計，Chilam所持有的股份屆時估計價值約1億港元，三年便成功進帳2億，可謂袋袋平安。

有興趣簽潛質藝人

記者致電Chilam求證，他說：「同蕭定一合作愉快，係佢對我有信心，大家方向一致。（進帳2億？）老土啲講，都係講心唔講金，最重要大家做到嘢出嚟。（做CEO？）咁快？我真係矇查查。其實係有提過合作一間公司，但冇咁快講。（同謝霆鋒睇齊？）邊敢當，自己係有興趣簽啲有潛質藝人。」

Chilam於簽約儀式上透露當初與蕭定一簽下三年合約，現只履行了一年。問到是否八位數字酬勞？他說：「今日去完見會計，交好多稅，唔想講呢啲。（入股公司？）都係嗰啲咁嘅嘢囉！唔覺得我今日好似大亨咩？」而蕭定一坦承與Chilam或會以Partner方式合作，至於入股一事？他說：「有計劃過但未實行。（送股份？）呢個世界冇免費午餐嘅，佢值得有呢個收入。（八位數續約？）好似唔止喎！如果以每年計佢益咗我o架！依家合約會到2019年。（億計？）做人唔好太市儈。」

獲贈真金「大亨」牌匾

此外，蕭定一向Chilam送上以鍍金製成的「張智霖肖像」及一道以真金打造、寫着「The Great Chilam」字樣的牌匾，並對他說：「祝你由藝人變成大亨」。