英皇藝人陳家樂近期豬籠入水，一口氣接拍兩套新片，其中一部更挑戰做廚房佬，自認廚藝「小學雞」的他早前特別跟師傅秘密練兵，臨近聖誕更私下「補鐘」炮製聖誕大餐，準備向親朋好友一展廚藝。雖然煎牛煮鴨時有板有眼，但過程中仍頻頻「蝦碌」，裝飾蛋糕時更雞手鴨腳，場面惹笑。

陳家樂拎起鑊鏟耍花式，搞到和牛應聲跌落地，蝦碌連場！

雖是廚藝「小學雞」，但陳家樂經師傅指點後，即變身小廚神。

澳洲和牛一燒
在鐵板上塗上油後，將和牛平放板上兩面煎。

待熟透後，用兩個鑊鏟將和牛捲起。

香煎法式鴨肝
先在鴨肝灑上適量鹽和黑椒。

再於鐵板上煎香鴨肝兩面。

聖誕心太軟
用朱古力和紅、綠色糖漿在碟上畫出喜愛圖案。

將焗好的心太軟放於碟上，再於蛋糕上灑上適量糖霜。

陳家樂在碟面寫字裝飾，雖然震過貓王，但效果都唔錯喇！

陳家樂

陳家樂拍畢英皇電影《破風》後人氣急升，成為片約一部接一部，二月將夥拍影后惠英紅主演溫情片。戲中飾演茶餐廳廚房佬的他，將挑戰一大「弱項」親自下廚，笑言自小學考童軍煮食章後，廚藝多年來未有進步：「當年學過煎蛋、腸仔同煮白飯，由嗰時嘅廚藝維持到依家，識煮嘅嘢就冇再多過，但我廚藝好掂，好精嗰幾樣！我覺得自己煮白飯好叻，媽咪教我用手量度，仲讚我手感幾好。」

為做好角色不「假手於人」，電影公司安排廚師過家樂兩招，未曾煮過一餐飯的他坦言：「嚟緊聖誕節都想試吓煮餐飯畀朋友、家人食。」他早前又到銅鑼灣拜訪牛扒專家，向師傅學煮三道聖誕菜式當熱身，炮製「澳洲和牛一燒」及「香煎法式鴨肝」時，由調味到落鐵板煎都有板有眼，獲師傅讚有天分後即「鬆毛鬆翼」，拎起鑊鏟亂舞耍花式，未幾即失手將和牛弄跌落地，相當搞笑！家樂說：「第一次煮和牛都唔難，但手腕技術要好，師傅話要翻得快，平日用筷子可能易做到，但今次用呢啲『架生』就唔慣，所以成日甩手、周圍跌。」並指還想學煎牛扒，皆因煮法不太複雜：「最緊要掌握到火候，落少少黑椒同番茄仔就已經好好味。」

炮製心太軟手震

其後，家樂學裝飾「聖誕心太軟」蛋糕，見他寫朱古力字時手震震，寫到似「麥兜字」，連他也自嘲核突：「我一向美術嘅嘢都唔叻，其實好難寫呢個字，因為要捏住個朱古力，等佢慢慢滲出嚟，多得滯又會一舊，少得滯又唔出，個力度好難掌握。（將來整畀女友食？）如果整到咁靚可能要等十年八載。」問到學有所成的話會否考慮搞飲食生意？家樂說：「搵錢角度都有興趣，但自己落手就唔好喇！」

酒量差嚇親偶像

由於新片要營造頹廢感，家樂需要全程叼煙，他憶述拍攝《戀人絮語》時首次拍食煙戲便出事：「當時唔知一個鏡頭拍幾個機位，所以好投入一個鏡頭食一支煙，結果五分鐘食四、五支，一Cut機就去嘔！」他又透露稍後會拍攝喜劇，片中要劈酒表現瘋狂一面，酒量甚差的家樂自爆醉後語無倫次，曾在偶像張家輝面前失儀：「有次喺After Party飲醉咗，衝埋去攬住佢話『家輝哥，我真係好鍾意睇你做戲，希望有機會同你合作啦！』搞到佢好尷尬咁話多謝，勁核突囉！」