歌手林欣彤（Mag）、周志文與陳日豐前晚出席活動與粉絲狂歡倒數聖誕，Mag慫恿父母當眾親吻，又自爆早前火燒「蠱惑蠟燭」，大擺烏龍！

陳日豐（左起）、林欣彤與周志文和粉絲齊齊倒數聖誕。

Mag慫恿父母即場錫錫晒恩愛，認真百厭！

陳日豐玩遊戲時親手餵食，Fans肯定甜到入心！

歌手林欣彤、周志文與陳日豐前晚到屯門與粉絲狂歡倒數聖誕，除了熱唱新歌外，又與粉絲玩遊戲。Mag的父母亦有到場支持女兒，孝順的Mag在台上示愛，更慫恿雙親當眾Kiss，Sweet爆全場，她說：「父母同親戚特登過嚟，因為可以一齊過聖誕。」她又透露弟弟剛畢業，期望有時間舉家旅行。

陳日豐聖誕唔Lonely

提到早前在微博上載不能燃燒的「蠱惑蠟燭」，Mag自爆當時擺烏龍：「我唔知個蠟燭係電動嘅，仲攞打火機去燒佢，燒到個頭都燶埋，連我隻狗都走埋嚟睇！佢嘅質地真係好似真蠟燭，我研究吓、望吓個底先知原來要插電！」提到聖誕佳節會否與「巨聲幫」開派對慶祝？她透露「巨聲幫」每逢節日或活動後都會打邊爐慶祝，但暫時未知聖誕的安排。

同場的周志文表示看過Mag有份主持的旅遊節目《這個聖誕不太冷》後，亦有意出國：「希望做晒工作可以同媽咪、細佬去旅行！」至於陳日豐則憶述在加拿大留學時的難忘聖誕，當時初次與朋友偷偷飲酒：「飲咗一罐就醉，瞓醒時發現畀人畫到變咗花面貓，仲掛到成身都係聖誕樹裝飾！」問到聖誕可有約會？他自爆或有女友人相伴，彼此的關係有望更進一步！