導演杜琪峯、袁和平及影星錢小豪前晚出席《鮮浪潮2014國際短片展》閉幕活動，提到成龍新片《絕地逃亡》在欣澳倒扣灣取景時翻艇，資深攝影師「高佬」陳國雄墮海身亡，由新西蘭完成電影《臥虎藏龍2》返港的袁和平認為事件相當「陰功」：「點解畀架咁唔安全嘅船人坐？咁係唔啱o架！拍咩片都要注意安全。」

成龍對於新片劇組發生人命意外，大表痛心。

杜琪峯（左）與袁和平出席電影活動。

杜琪峯則說：「點解八個人坐一隻舢舨？當時好大浪？真係諗唔到會有意外，拍戲要注重安全，有時會大意，但拍戲唔應該搵命博，依家拍戲其實冇以前咁危險。（你拍嘅戲有冇試過發生意外？）冇咁大件事，最多係斷手斷腳，香港咁亡命拍電影都好少死人。」至於與太太及12歲兒子到場的錢小豪，強調拍戲要顧及安全，並認為舢舨坐八個人是超載。

對於疑似超載問題，成龍昨日回應說：「警方同船家落咗口供，20呎船坐八個人唔存在超載，同埋當時喺現場嘅工作人員同我講，當時佢哋係分布唔同位置坐。」提到電影人會捐助「高佬」家人，成龍承認將以私人名義捐錢，劇組亦會捐助。