英皇小花冼色麗（Bonnie）、王嘉慧（Jessica）及岑紫生（Kimberly）早前相約預祝聖誕，看見枱上各式各樣的美食，三人速現為食樣！廚藝一般的Bonnie希望覓得「煮」家男！

對下廚零興趣的冼色麗，希望找個「廚神」男友。

為食妹岑紫生（左起）、冼色麗及王嘉慧對桌上美食相當興奮。

嘉慧希望遇到心儀男生，為對方整愛心餐。

冼色麗、王嘉慧和岑紫生日前相約到銅鑼灣某牛扒專門店，大擦自助餐提早賀聖誕，三人面對長腳蟹、生蠔及燒牛肉等佳餚即食指大動，看到堪稱全港最長的「聖誕樹頭蛋糕」，嘆為觀止的Bonnie揚言唔捨得食，Jessica則興奮地與「聖誕Cupcake塔」合照！

冇對象下廚

為食的三名靚女從未煮過聖誕大餐，試過整薑餅的Bonnie說：「有年諗住送畀朋友，雖然味道唔差，但啲糖膠好難整得靚，整完出嚟好核突，自己都唔好意思送畀人！」並聲言不喜歡下廚：「基本嘅湯、餸都識煮，但我對整嘢食興趣唔大，最好男仔可以整晒畀我食，希望搵到個識煮嘢嘅男友！」

閒時會下廚的Jessica說：「媽咪教過我煲湯，最拿手係椰菜粉絲蒸水蛋，要煮餐飯都過到關嘅，添加情趣嗰啲就唔識！（煮過畀男友食？）我冇煮過畀任何男仔食！因為未遇到一個值得我下廚。」

警察送公仔

談到聖誕計劃，過節愛去旅行的Bonnie選擇留港與大班朋友度過，她笑說：「幾個Group Chat約緊聖誕倒數，依家諗緊邊度比較鍾意食！」顧家的Jessica指每年均會粉飾家居，Kimberly則會抽空返美國與家人共度白色聖誕，她透露最難忘十多歲時在美國迷路，後來在警署獲警察送公仔安撫。