謝霆鋒代言的新樓盤首輪開賣銷情理想，霆鋒昨日在樓盤發布會上賣口乖大讚景觀開揚且私隱度高，但即使落足嘴頭狂Sell，他仍未獲老闆送單位，更笑說：「今日連楊生都冇嚟，驚我講呢樣嘢！」

霆鋒笑言老闆缺席是早有先見之明，怕他要樓當酬勞。

霆鋒在發布會上為火雞淋汁，果然煮得！

謝霆鋒昨日為代言的新樓盤「維港峰」Upton出席發布會，早前樓盤已進行首輪開賣，銷售情況理想。活動上霆鋒聯同英皇集團（國際）執行董事張炳強先生，向一眾地產代理頒發獎項以示鼓勵。

盡力做好代言人本分的霆鋒，受訪時亦繼續大讚新樓盤：「樓盤嘅配套好完善，而且有180度海景，唔會畀人影！」又稱向來買樓都以私隱度高為首選條件。問到老闆楊生可有送單位作酬勞？霆鋒卻笑說：「經理人冇講，今日連楊生都冇嚟，可能驚我講呢樣嘢。」

行程排到2016

霆鋒又稱因工作關係經常要坐飛機：「成日要飛嚟飛去，飛機上面瞓覺時間仲多過屋企。尋日先去完葡萄牙，之前一日就喺倫敦拍廣告。」問到是否因而轉攻舖位？他說：「唔知呀，依家做好手頭上嘅嘢先啦！我經理人當好似有三個謝霆鋒咁接工作，已經排到2016年！」

電影精神搏盡

對於日前一名資深電影攝影師在拍攝成龍的新戲時不幸墮海身亡，霆鋒表示略有所聞，當從記者口中得知事主身份後，即搖頭嘆息：「一定合作過啦！我出道15年，所有工作人員都好好感情，好似一家人咁。」對於日後拍戲的安全，他說：「我知道大家都唔想我出事，總之我能力範圍內，為件事好嘅我都會做，呢個先係電影精神。」經理人霍汶希（Mani）又爆料指霆鋒有次為《逆戰》拍攝跳海場面險出事：「霆鋒由躉船度跳落海，足足有三分鐘冇上番嚟，嚇死我！」