安仔Phone騷闔家慶功搞喊囝囝
出爐視帝郭晉安前晚以大熱姿態第三度稱帝，因太過疲勞而未有與粉絲慶祝。而昨日雖只得老婆歐倩怡獨自湊囝囝返學，但在無綫繼續開工的他表示會與家人齊齊慶功兼慶祝老婆生日！至於輸家黎耀祥、陳展鵬及鍾嘉欣，雖失落視帝后，但仍獲粉絲支持，輸獎唔輸陣！
安仔興奮親吻視帝獎座。
歐倩怡獨自湊仔返學，當記者恭喜安仔稱帝時，她即展現甜笑。
祥仔喜獲大班粉絲送花，輸人唔輸陣。
失落視后的嘉欣BB，與粉絲舉牌合照。
陳展鵬輸視帝未見失望，並大讚對手強勁。
無綫《萬千星輝頒獎典禮2014》前晚圓滿結束，視帝視后由大熱的郭晉安及佘詩曼奪得，憑劇集《忠奸人》第三度奪視帝的安仔，在頒獎禮後接受官方刊物的訪問及影相，然後直接回家，沒有與現場守候的粉絲見面。成為出爐視帝的他似乎太過勞累，昨晨八時左右只見其太太歐倩怡（Cindy）送囝囝郭令山返學，安仔冇影。戴黑超兼素顏的Cindy，見到記者即揮手微笑，並在車廂受訪。本報記者上前恭喜安仔奪視帝，她甜笑：「多謝！（安仔玩到好夜，所以冇送囝囝返學？）係呀！」及後因座駕停泊位置不容許停留，故Cindy向記者講拜拜後駕車離開。
羅蘭姐送抱祝賀
而安仔昨日返回無綫接受訪問，他坦言會在晚上與老婆及一對仔女食飯慶祝，兼順道慶祝老婆35歲生日。問到送甚麼禮物給老婆？安仔說：「佢（老婆）一早講咗話想去旅行。（做咗視帝會加碼去歐洲？）去邊都冇所謂，太遠嘅地方就要等對仔女大啲先。（尋晚點？）好攰，凌晨成兩點先返到屋企，但都仲未瞓得，因為個電話畀WhatsApp轟炸，收到好多朋友嘅祝賀，覆咗兩個鐘都未得，要今（昨）日朝早再繼續覆。（囝囝點？）畀咗個獎佢睇，見到佢眼濕濕！原來佢覺得我係咁重要。」安仔受訪期間獲羅蘭送抱祝賀。
鍾景輝搞Gag玩嘢
提及前晚鍾景輝宣布「最佳劇集」時搞Gag指是三個字，安仔坦言十分尷尬：「佢講完我已經想同田蕊妮擁抱，點知唔係，不過都冇失望。但好開心個節目咁高收視，全城睇到我拎獎，希望大家可以搵番睇電視嘅刺激。」
至於成為安仔手下敗將的黎耀祥及陳展鵬，雖然失落視帝，但仍輸人唔輸陣，有粉絲撐場支持！前晚兩人約於晚上11時離開無綫，展鵬步出門口後，現場約30名粉絲以燈牌迎接，問到失落視帝有否傷心？他說：「唔會，今年對手好強勁，安仔係實至名歸。」祥仔則獲粉絲送花，他亦讚安仔實至名歸：「冇失望，安仔係大熱。（慶祝？）開早呀！唔會去慶功宴。」
另外，失落視后的鍾嘉欣，現場有近20名粉絲舉起燈牌為她打氣，她與粉絲合照後便登車離開。
