型男沈震軒與靚女港姐陳凱琳角逐今年台慶「飛躍進步男、女藝員」，兩者都獲幸運之神眷顧！前者因易角而得以演出《使徒行者》連浩勤一角；後者在處女劇《名門暗戰》演出備受觀眾讚賞，未知兩人能否將好運延續到頒獎台上？

陳凱琳劇接劇，在處女劇《名門暗戰》中演技甚佳！

沈震軒在《使徒行者》演Kobe一角，備受讚賞。

陳凱琳（Grace）去年在17萬觀眾支持下贏得香港小姐冠軍，加入無綫後即「飛躍」進步，憑口才攀上台慶大騷司儀之列；主持飲食節目《搵食飯團》也大受歡迎；處女劇《名門暗戰》中飾演蔣勵一角，亦廣受觀眾愛戴，以新人來說發揮實在是「超額完成」。雖然她在「女飛躍」候選名單中資歷最淺，卻來勢洶洶，大有機會以「新人王」姿態贏得獎項。

壓力大冇諗攞獎

正身在橫店拍攝重頭劇《張保仔》的Grace，坦言處女劇壓力極大，但聽到觀眾給予正面評價，十分感恩！得知提名「女飛躍」更是額外獎勵，她說：「真係冇諗過攞獎！其實提名都冇諗過，第一套劇有提名已經超額完成！（會出席頒獎禮？）我都好希望親身出席感受頒獎禮嘅氣氛，但依家仲喺橫店拍緊劇，遲啲再要去無錫繼續拍，應該出席唔到今年頒獎禮，希望下次有機會可以參加，同大家玩番一晚！」

型男沈震軒（Sammy）憑劇集《使徒行者》及《大藥坊》的表現備受讚賞，雖然在五名候選人中，本年度作品量最少，但他在《使》劇中的演出實在搶鏡，他說：「我都好開心接到《使徒》同《大藥坊》呢兩個好唔同嘅角色，Kobe（《使徒行者》連浩勤）係我拍完監製文偉鴻《My盛Lady》後再次合作，佢令我學咗好多嘢。而《大藥坊》個奸角魏俊，佢嘅奸係深層，唔係奸在表面，最後仲變成喪心病狂，係好爆嘅角色，兩個劇係差唔多時間拍嘅，我好似分裂咗咁！好開心觀眾都有好好嘅反應。（有信心攞獎？）平常心，五十五十，最大對手係張繼聰，我都好鍾意佢，佢亦忠亦奸好全面，樣樣都做得好，我睇好佢！（得兩個作品輸蝕？）上年我擺咗啲時間做音樂，分散咗，不過我覺得貴精不貴多，重質多過量。」

苦盡甘來獲讚賞

Sammy在《使》劇中的付出極大：「拍單車捉賊嗰場戲整斷手，係入行以來最辛苦，連着衫都着唔到，好在父母由加拿大返嚟，起居生活有人照顧，但每晚都會忟憎點解會受傷？好彩錯有錯着，傷咗隻手好似幫咗個角色，令呢個臥底更有立體感。（同易角一樣冥冥中有安排？）我原本唔係演呢個角色（原本飾演葉兆良，因森美辭演連浩勤一角，遂由他頂上。），緣分令我接到呢個角色，起初我諗我得唔得o架？好多謝監製同編劇為我將角色做咗啲修改，但後尾又斷手，當時擔心過呢個可能係我最差嘅一次演出，好在後尾觀眾反應幾好，諗番轉頭幾刻骨銘心！」