早前已奪得兩個視后獎的佘詩曼已被外間認定會食住上，大熱封無綫視后，難怪她昨晚出席無綫盆菜宴時氣勢澎湃，更不停被同事「集郵」，風騷的她不知此行要拉票，而勁敵鍾嘉欣則投晒降，笑言輸給阿佘絕對心甘命抵。

佘詩曼

在網上流傳的名單沒有獎項，但子珊並不介意。

嘉欣笑言視后輸給阿佘是「心甘命抵」。

祖藍為女友李亞男拉票，不過都係搞吓笑。

翠如BB傳攞「飛躍進步女演員」，男友蕭正楠梗係開心啦！

汪明荃（前排左起）、田蕊妮、米雪與張繼聰舉杯慶祝。

無綫昨晚於電視城筵開200席舉行盆菜宴，約有2,400名員工出席，其中約300名藝人撐場，包括佘詩曼、徐子珊、鍾嘉欣、朱千雪、黃翠如、蕭正楠、高海寧（高Ling）、馬賽、王祖藍、李亞男及張繼聰等。因臨近《萬千星輝頒獎禮2014》，眾星也趁機拉票，不過祖藍及陳智燊不忘為另一半拉票，祖藍笑說：「希望大家盡量投李亞男，咁佢就唔會得幾票。」

冇獎子珊嗌正常

雖然頒獎禮尚未舉行，但網上經已流傳得獎名單，郭晉安與佘詩曼分別奪得視帝后、蔣志光與陳敏之獲男女配角、喜愛角色則由林峯及鍾嘉欣獲得、飛躍進步男女藝員是張繼聰及黃翠如。大熱視后阿佘於場內最受歡迎，滿場飛的她忙於應付同事索合照，可謂未鬥獎先贏氣勢，雖然全程無暇坐低抖氣，但她卻樂在其中，似乎對視后獎信心十足，而她更沒有準備拉票，對此阿佘笑說：「咩要嚟拉票？我唔知嘅，唔係嚟食飯咩？其實冇準備啫！（網上名單係你攞視后喎！）唔會，投票都未截止，都想個個開心。（鍾嘉欣話輸畀你心甘命抵？）咁佢都做得好好，請大家支持《大藥坊》。」對於林峯也榜上有名，阿佘坦言對方粉絲多，但未知拍檔會否出席頒獎禮。

而一直恨攞視后獎的鍾嘉欣則一臉倦容，對於網上流傳阿佘封視后，她說：「都想佢攞，好欣賞佢，輸畀佢心甘命抵，佢係藝人好榜樣。（唔拉票？）朋友話我冇呢種潛質，口齒唔伶俐。（話你攞角色獎。）我都想攞呢個獎，因為《飛虎Ⅱ》角色我轉型做打女。」曾攞住大聲公拉票的子珊則表示冇準備拉票，談到網上流傳名單沒有她，子珊謂正常，同時否認有情緒問題之說。

翠如BB零信心

至於盛傳獲得「飛躍進步女演員」的翠如，卻自言零信心：「機會好微，我估係高Ling，不過點會咁快有賽果。（網上張名單冇蕭正楠。）咁蔣志光係好大機會，佢絕對係香港最大光榮呀！」張繼聰則自言脫俗，沒有留意賽果資訊，更說：「有提名已經好開心同光榮。」