由組合變成單飛的模特兒盧頌之,出道以來曾有不少演出機會,但為了愛情卻一一錯失。如今重新出發的她希望向外界證明自己對演戲的熱誠,為應付將來的角色需要,更積極裝備自己,誓言要撇除「o靚模」之名!

為拍拖推Job一段日子,盧頌之坦言錯過了不少機會,但已恨錯難返。

盧頌之

改了一頭短髮的盧頌之(左)重建星途,還成功Casting再拍戲。

盧頌之「消失」一輪後重新工作,夥周秀娜等拍電影。

八模散Band後,盧頌之改與A.Lin拍住上出寫真,當時演出機會處處。

盧頌之加入「八模兵團」而入行,開始廣為人所熟悉。

盧頌之與男友趙勁皓拍拖後,從對方身上學到不少人生哲理。

盧頌之

模特兒盧頌之(DaDa Lo)由舊八模開始闖出名堂,其後挾「翻版阿嬌」之名與拍檔裴殷(A.Lin)推出寫真集,再隻身由模界轉戰影圈。出道短短四年,她亦自認所經歷的似乎比別人多:「入行幾年就好似經歷咗人哋十年先經歷到嘅嘢,由起初一班女仔柴娃娃好開心,之後得番同A.Lin兩個人,再到依家得自己一個。開頭一定有啲唔習慣,始終有個人陪咗你咁耐,同埋大家相處咁耐有咗默契,面對一啲唔識答嘅問題都會有人幫你拆。」

除了事業發展有所轉變外,DaDa Lo四年來亦成長不少。19歲出道的她自言以前戀愛大過天,曾經為愛情放棄事業:「我對上一個男友唔係好鍾意我做呢行,當時會覺得:『好啦!你唔鍾意咁我就唔做,反正都打算結婚。』所以嗰時有人叫我拍戲都推咗唔做。試過出晒Poster話我會去行騷,都突然唔出現。當你一次推、兩次推嘅時候,人哋就唔會再搵你。」

不再任性

那些年錯過的機會,令DaDa Lo開始學懂珍惜,任性不再的她更揚言會努力把握以後的每個機會:「以前推Job時會諗:『Job之嘛!』依家先知道呢啲機會好難先有,但嗰時唔識珍惜,依家惟有重新開始,建立番信心畀人哋!其實諗番唔多唔少都有啲後悔,但又覺得如果當初冇經歷過呢啲嘢,我仍然會係個好任性嘅人,唔會識得珍惜,唔會識得去多謝嗰啲肯畀機會我嘅人。」

為證明已從錯誤中成長,DaDa Lo趁空檔積極裝備自己,更放下身段透過體驗不同職業的生活方式,去豐富人生經驗及揣摩角色:「我覺得一個成功演員裏面應該要有好多嘢,有人會好有演戲天分,但我冇就惟有靠累積經驗,例如幫人做吓形象設計,先會知要兼顧好多嘢,當你真係做過嗰件事,就會知後面花過嘅工夫。即使將來有人搵我拍戲演形象設計師,點樣可以做到入型入格,演繹到深入啲嘅嘢而唔係得個殼,就要由生活細節入手。趁未有電影工作時,我會去試唔同崗位累積經驗當係學嘢,例如之前跟過電影嘅服裝設計、依家幫King(男友趙勁皓)打理健身房,得閒又幫吓朋友做Sales咁。」

不再o靚模

出道以來一直被冠以「o靚模」之名的DaDa Lo,與時下為上位又奇招盡出的o靚模雖有分別,但外間難免會將兩者相提並論。其實她對「o靚模」身份並不抗拒,但希望終有一日能夠正式成為「演員」:「可能啲人界定唔到你係邊個Category(類別),就將你撥埋落去,但我希望有一日喺報紙個名唔係叫『o靚模』,而係『演員』或者『藝人』。」

「King教我靠自己」

以往愛情第一的DaDa Lo自與模特兒男友King拍拖後,心態亦變得成熟,更驚覺女人要多靠自己:「同King一齊之後,先醒覺原來要靠自己多啲,但我之前係冇呢個Concept。King係一個事業心好重嘅人,佢會教我要多啲靠自己,唔可以成日靠人哋,就算結咗婚都應該要有自己嘅事業。以前失去太多機會,所以依家事業同愛情會平衡番。」與King甜到漏的她不諱言希望以情侶檔姿態出騷搵真銀:「之前曾經有人搵過我哋一齊出活動,最終因為夾唔到時間而冇成事,當然會想多啲情侶檔出騷啦!可以搵多啲錢嘛!」

後記:唔剪唔知時運高

出道以來一直以長髮示人的DaDa Lo,今年毅然剪短頭髮,原來只因一時衝動,卻意外獲得更多工作機會,她說:「當初剪髮係為新鮮感,剪完後身邊朋友嘅評語各有不同,但係就Cast中咗部獨立電影,又中埋廣告等。」工作機會多了,但她笑言較愛長髮造型,更驚覺原來自己「都幾靚女」!其實DaDa Lo性格爽朗又「男仔頭」,短頭髮令形象變得鮮明,加上剪髮後工作機會不斷,似乎更有利她的個人事業,她大可考慮Keep住「男仔頭」呢!