DJ阮小儀與友人合資的車仔麵店昨晨失火，幸消防員趕到未釀成嚴重事故，小儀昨日出席電台活動，慶幸有驚無險未有人受傷，最大損失只是爆爛大閘門鎖及燒燶湯煲。

小儀昨日與馮允謙做直播，未受店舖失火影響。

消防員灌救後，現場留下水漬。（胡德威攝）

小儀位於大角咀的車仔麵店昨晨二時疑因員工放工前忘記關掉爐頭，將老火豬骨湯煲足4粒鐘，最終煲乾水冒出大量濃煙，大廈保安發現即時報警，消防接報到場後出動一條水喉和兩隊煙帽隊破門灌救，14分鐘將火救熄，發現煲燶湯，事件中無人受傷，起火原因亦無可疑。昨晨有員工返店舖善後，因店內未受太大損毀，可以照常營業，但未見老闆娘小儀現身。

拍檔瞞住唔敢講

原來小儀昨午要到屯門做電台直播，見她心情未受失火影響，她說：「好小事，我同拍檔了解過，只係有個員工做錯事，因為每晚我哋啲湯底都要淆定，但負責嘅阿姐唔記得加水同熄火就放工，所以先發生。（有冇點算損失？）事發時舖入面冇人，最緊要係人冇事，亦冇影響附近街坊，最大損失咪畀消防員爆咗個鎖，同埋燒燶咗個湯煲。」又稱事發後拍檔因怕嚇親她而未有相告，直至早上起來看到手機很多訊息，差點嚇親！其後，小儀在微博留言報平安，又着大家放心。

至於歌手馮允謙昨日任小儀節目的嘉賓，提到不少一線歌手不出席頒獎禮，陳慧琳提議取消男女獎項時，阿謙覺得對歌手是一個目標，始終要保留。