《歡樂滿東華2014》昨晚舉行,多位歌手及藝員落力表演籌款,明年結婚的王祖藍人逢喜事精神爽,成功將善款推高!嬌滴滴的岑麗香及高海寧等與港隊鬥划艇,畫面夠動感!

岑麗香划艇時Big波盪漾,男士睇到眼甘甘!

陳庭欣(圖)與高海寧同樣落力,動感滿Fun。

高海寧

張振朗扮張智霖就叻,估唔到扮哥哥一樣掂。

「蝦頭」楊詩敏扮阿梅,維妙維肖。

姚兵半裸上陣扮吳剛師傅,好似肥咗啲喎!

王祖藍指揮小寶玩遊戲,電視機前都感受到有幾肉緊!

多位歌手及藝員昨晚出席慈善節目《歡樂滿東華2014》,曾志偉、汪明荃(阿姐)、曾華倩及黎芷珊等擔任主持,譚詠麟獻唱多首金曲籌款,而開場環節猶如《Sunday扮嘢王》,有楊詩敏(蝦頭)扮梅艷芳與張振朗扮張國榮,姚兵模仿吳剛更半裸上陣搽油耍功夫。

明年二月迎娶李亞男的王祖藍負責環節「為食籌款彈一餐」,人逢喜事精神爽的他被問到是否以旺氣帶動善款?他笑言只是玩小遊戲,並透露日內出發到馬爾代夫影婚紗相,逗留約一星期,問到亞男的泳裝婚紗性感程度,祖藍說:「我都唔知佢帶咩去,未得閒理佢!成個星期冇見未婚妻!但佢唔使減肥。(你呢?)叫佢唔使旨意,我唔會有六舊腹肌!呢個Trip都會研究婚宴賓客名單,真係好頭痛!酒席有八百幾人,但我哋識嘅人都有半間TVB!(Cut走啲人?)最煩係坐位。(擺幾日?)諗過,都係唔好喇!」

而以低胸裝出場的岑麗香,節目中與高海寧及陳庭欣等換上貼身運動裝挑戰香港代表隊成員,划艇夠晒動感,她說:「平時我冇玩健身,最近一次已經係13歲體育堂。(夠氣?)幾次綵排都OK!鬥快啫!(自己平時會捐錢?)每年都會預留一份錢捐去教會,賺多啲捐多啲。」而汪阿姐的Fans Club「明荃之友會」捐出以總值10,800港元紙幣摺成的花樽,底價38,000港元,她讚Fans夠心思又有創意。

家燕姐冇得唱

每年《東華》都有多個粵劇表演,今年更獲名伶龍劍笙(阿刨)撐場!早前阿刨返港演出折子戲《任藝笙輝念濃情》叫好叫座,她亦特別錄影《牡丹亭驚夢》及《紫釵記》為節目籌款。另外,近年熱爆的環節「卡拉之星」霸主薛家燕今年因忙於拍戲沒有時間排練,無奈未能參加,她直言很多Fans感失望,自己亦感抱歉。