《萬千星輝頒獎典禮2014》視帝后將於下月15日誕生，轉投英皇的林峯憑「爆Seed哥」角逐視帝，但未開始投票已認輸兼預告缺席。而無綫高層近日向製作部講明一旦力捧藝人約滿跳槽，未來一至兩年將減其曝光率。

轉投英皇的林峯表示因工作缺席「娘家」無綫的《萬千星輝頒獎典禮2014》，未爭視帝已認輸！

洪卓立彎身「抱起」女友湯怡晒恩愛。

林峯（右起）、老闆楊受成、Joey及楊受成太太陸小曼一同參加陸運會。

抱恙的Joey循例到跑道上行兩圈以示支持！

許靖韻（左起）、陳家樂、張敬軒、泳兒及衛詩雅齊以運動裝上陣。

林峯自7月底離開効力十五年的「娘家」無綫後，終以一億元天價賣身英皇三年做親生仔，已離巢的他在劇集《使徒行者》表現出色，故獲無綫准許於下月15日的頒獎禮角逐視帝！惟據本報可靠消息得知無綫高層近日在內部會議向製作部落柯打，若力捧藝人約滿後加盟其他公司，無綫在未來一至兩年會盡量減其曝光率，意即不會找該跳槽藝人演出重頭劇，旨在對旗下藝員公平。若是綜藝節目，因以唱片公司為單位，若唱片公司派出跳槽藝人參加則冇問題，變相令林峯「首當其衝」。

難怪林峯對稱帝打定輸數！他昨日與楊受成博士、容祖兒（Joey）、張敬軒及洪卓立等出席英皇活動《英皇愛心灌全城陸運會2014》，是加盟英皇後首次出席公司活動，林峯雖未有參加競賽，但老闆楊受成一見他即主動搭其膊頭，事後林峯表示專誠來打氣，感覺似大家庭的同樂日，正忙於收歌及錄音準備出碟。問到是否有信心封視帝時，他竟「認輸」說：「冇乜信心同埋知機會唔大。（因為冇約？）唔關事，覺得有進步空間，表現仲可以好啲！（咁會唔會去頒獎禮？）撞咗期，要去內地工作，應該去唔到。（你冇續約無綫都畀你角逐視帝！）乜唔係嗰年有劇出就可以提名咩？你哋問番無綫。」

自林峯離開無綫後，有指王祖藍及吳卓羲亦將相繼約滿離開，問到是否覺得闖出一條路來，林峯說：「唔關事，自己決定自己嘅路。（條路你開出嚟？）唔關事！我只係咁啱呢個Timing想試吓唔同發展。（去唔去十大勁歌頒獎禮？）都冇歌，四個都唔去。」對於林峯缺席無綫頒獎禮，英皇藝人部副總經理廖先生接受電話訪問時說：「佢嗰晚要去廣東省出席商演，趕唔切返嚟香港啫。」又指林峯下月排滿工作，明年初會推出新歌，故要為新歌事宜開會包括商討可能往美國錄音及拍MV。

Joey咳傷橫膈膜

至於Joey則因抱恙未有落場，更咳傷橫膈膜：「咳到冇力，連開門都冇力，一用盡力隻腳已攝喺門底，叫都冇聲，睇住隻腳有血！」對於有傳缺席年底頒獎禮，她說：「26號要去美國做騷，同屋企人都唔舒服，分唔到時間。（陳奕迅唔去你唔去？）時間安排到會出席當享受！」