陳凱琳於台慶劇《名門暗戰》的強姦戲勢成全城熱話，爭獎自然被睇高一線，同為「最佳女配角」競爭對手的陳敏之今年憑劇集《使徒行者》先後在新加坡及馬來西亞連奪女配角獎，但面對陳凱琳的瞓身挑戰，她不忘讚對方港姐出身潛力高：「嗰時一選完就好鍾意佢，覺得佢又靚、口才又好，好適合演戲。（覺得公司力捧佢？）正常都會啦！我係公司都一定會栽培佢！」對於爭獎一事，敏之相信獎項公平，結果交由評判及觀眾投票決定，即使落選亦不會失望，有提名已經感恩。

賽前連奪兩女配角獎的陳敏之睇好陳凱琳有潛質，萬一輸畀對方都服氣。

「飛躍」大熱門高海寧先禮後兵，賽前大笠對手「高帽」。

另一花旦高海寧同時與陳凱琳爭奪「最佳女配角」及「飛躍進步女藝員」，昨日出席無綫劇《愛．回家》宣傳活動時亦激讚對手：「個個都強勁到爆呀！雖然我都有信心嘅，但係平常心面對囉！」